aarzu-e-dawam ne mara

ārzū-e-davām ne maarā

jalva-e-sub.h-o-shām ne maarā

sar-kashī gaam gaam par mujh se

is dil-e-bad-lagām ne maarā

ibtidā kī na intihā kī ḳhabar

qissa-e-nā-tamām ne maarā

aql ḳhud hī shikār-e-jazba huī

ġhaznavī ko ġhulām ne maarā

hirs ne kuchh bhī dekhne na diyā

dāna-e-zer-e-dām ne maarā

sach to ye hai ki ibn-e-ādam ko

jazba-e-intiqām ne maarā

maiñ 'amīñ' kab fareb khātā thā

dahr ke ehtimām ne maarā

aarzu-e-dawam ne mara

jalwa-e-subh-o-sham ne mara

sar-kashi gam gam par mujh se

is dil-e-bad-lagam ne mara

ibtida ki na intiha ki KHabar

qissa-e-na-tamam ne mara

aql KHud hi shikar-e-jazba hui

ghaznawi ko ghulam ne mara

hirs ne kuchh bhi dekhne na diya

dana-e-zer-e-dam ne mara

sach to ye hai ki ibn-e-adam ko

jazba-e-intiqam ne mara

main 'amin' kab fareb khata tha

dahr ke ehtimam ne mara