aarzu-e-dil ka ye anjam hona chahiye

ārzū-e-dil kā ye anjām honā chāhiye

kyā mujhe bhī 'ishq meñ nākām honā chāhiye

kyuuñ bhalā iblīs ko ilzām dete ho faqat

tum ko ḳhair-o-shar kā bhī ilhām honā chāhiye

baap kī dastār becheñ bahan kī khīñcheñ ridā

mard kī ġhairat pe ab nīlām honā chāhiye

matlabī duniyā meñ hai gum ibn-e-ādam is qadar

kaam honā chāhiye bas kaam honā chāhiye

DhūñDne se gar nahīñ miltā ḳhudā phir DhūñDhiye

sub.h us kī justujū meñ shaam honā chāhiye

gar nasīboñ meñ nahīñ vo shaḳhs likkhā ai ḳhudā

kuchh du'āoñ kā mirī in'ām honā chāhiye

'ishq kī me'rāj ho ai kaash aisā mo'jiza

naam koī le vo merā naam honā chāhiye

gar tujhe banñā hai 'tishna' shā.era ik be-badal

tere har ik she'r meñ ib.hām honā chāhiye

aarzu-e-dil ka ye anjam hona chahiye

kya mujhe bhi 'ishq mein nakaam hona chahiye

kyun bhala iblis ko ilzam dete ho faqat

tum ko KHair-o-shar ka bhi ilham hona chahiye

bap ki dastar bechen bahan ki khinchen rida

mard ki ghairat pe ab nilam hona chahiye

matlabi duniya mein hai gum ibn-e-adam is qadar

kaam hona chahiye bas kaam hona chahiye

DhunDne se gar nahin milta KHuda phir DhunDhiye

subh us ki justuju mein sham hona chahiye

gar nasibon mein nahin wo shaKHs likkha ai KHuda

kuchh du'aon ka meri in'am hona chahiye

'ishq ki me'raj ho ai kash aisa mo'jiza

nam koi le wo mera nam hona chahiye

gar tujhe banna hai 'tishna' shaera ek be-badal

tere har ek she'r mein ibham hona chahiye