aarzu jine ki thi imkan jine ka na tha

aarzū jiine kī thī imkān jiine kā na thā

ḳhvāhisheñ thiiñ saf-ba-saf sāmān jiine kā na thā

qarz thā terā so jīte-jī tujhe lauTā diyā

zindagī varna mujhe armān jiine kā na thā

dostī zahrāb se kī ranj-o-ġham se kī nibāh

varna ye māhaul merī jaan jiine kā na thā

zindagī tū chhoḌ merā saath maiñ be-zār huuñ

merā terā to koī paimān jiine kā na thā

maiñ ne hañsne kī aziyyat jhel lī royā nahīñ

ye salīqa bhī koī āsān jiine kā na thā

kuchh tirī rahmat pe takiya kuchh gunāhoñ kī kashish

varna us duniyā meñ to insān jiine kā na thā

zehn kī āvārgī minnat-kash-e-duniyā na thī

zindagī kā bhī 'mujībī' dhyān jiine kā na thā

aarzu jine ki thi imkan jine ka na tha

KHwahishen thin saf-ba-saf saman jine ka na tha

qarz tha tera so jite-ji tujhe lauTa diya

zindagi warna mujhe arman jine ka na tha

dosti zahrab se ki ranj-o-gham se ki nibah

warna ye mahaul meri jaan jine ka na tha

zindagi tu chhoD mera sath main be-zar hun

mera tera to koi paiman jine ka na tha

main ne hansne ki aziyyat jhel li roya nahin

ye saliqa bhi koi aasan jine ka na tha

kuchh teri rahmat pe takiya kuchh gunahon ki kashish

warna us duniya mein to insan jine ka na tha

zehn ki aawargi minnat-kash-e-duniya na thi

zindagi ka bhi 'mujibi' dhyan jine ka na tha