آرزو کامراں نہیں لگتی

آرزو کامراں نہیں لگتی

زندگی شادماں نہیں لگتی

ہے حلاوت نہیں بیاں میں جب

دل نشیں داستاں نہیں لگتی

میں سجا کر اسے بہت خوش ہوں

پھر بھی محفل جواں نہیں لگتی

عشق کے بول یوں تو دل کش ہیں

معتبر سی زباں نہیں لگتی

گفتگو کر کے آج جگنو سے

رات کچھ رائیگاں نہیں لگتی

رنگ خوشبو صبا نہیں مجھ میں

سوچ جنت نشاں نہیں لگتی

پیار کی وہ حسین سی آہٹ

جو وہاں تھی یہاں نہیں لگتی

پھول شبنم کا عکس لگتی تھی

وہ ہوا اب رواں نہیں لگتی

ساہنیؔ‌‌ جی ہزار کوشش سے

یہ زمیں آسماں نہیں لگتی