aarzu kab koi mohtaj-e-bayan hoti hai

aarzū kab koī mohtāj-e-bayāñ hotī hai

ḳhāmushī ḳhud hī mohabbat kī zabāñ hotī hai

rāhat-o-aish meñ ye baat kahāñ hotī hai

zindagī dard meñ Duube to javāñ hotī hai

tālib-e-ishq-o-mohabbat haiñ na pūchho ham se

shab kahāñ sub.h kahāñ shaam kahāñ hotī hai

jis nasheman kī ho ta.amīr meñ ḳhūn-e-mazlūm

us kī nigarāñ nazar-e-barq-e-tapāñ hotī hai

tū ne dekhī ho to kuchh tujh se kahūñ ai nāseh

kaif-zā kyā nigah-e-pīr-e-muġhāñ hotī hai

be-sabab tū na samajh nāseh-e-nādāñ is ko

Tiis sī ik jo qarīb-e-rag-e-jāñ hotī hai

ahl-e-dil ahl-e-nazar se koī pūchhe 'zamzam'

is mohabbat ko jo siine meñ nihāñ hotī hai

aarzu kab koi mohtaj-e-bayan hoti hai

KHamushi KHud hi mohabbat ki zaban hoti hai

rahat-o-aish mein ye baat kahan hoti hai

zindagi dard mein Dube to jawan hoti hai

talib-e-ishq-o-mohabbat hain na puchho hum se

shab kahan subh kahan sham kahan hoti hai

jis nasheman ki ho tamir mein KHun-e-mazlum

us ki nigaran nazar-e-barq-e-tapan hoti hai

tu ne dekhi ho to kuchh tujh se kahun ai naseh

kaif-za kya nigah-e-pir-e-mughan hoti hai

be-sabab tu na samajh naseh-e-nadan is ko

Tis si ek jo qarib-e-rag-e-jaan hoti hai

ahl-e-dil ahl-e-nazar se koi puchhe 'zamzam'

is mohabbat ko jo sine mein nihan hoti hai