aas hi se dil mein paida zindagi hone lagi

aas hī se dil meñ paidā zindagī hone lagī

sham.a jalne bhī na paa.ī raushnī hone lagī

intihā-e-ishq hai kaisī jafā kaisā gila

ab to un kī har ḳhushī apnī ḳhushī hone lagī

rok apnā haath rok ab ai junūn-e-jāma-dar

husn-e-parda-dār kī parda-darī hone lagī

uljhī uljhī saañs ghabrā.ī nazar bahke qadam

ai nigār-e-mast duniyā dūsrī hone lagī

chāñd merā kahkashāñ merī gul-o-ġhuncha mire

tum mire hone lage duniyā mirī hone lagī

Duube taare jhilmilā.ī sham.a shabnam ro paḌī

intizār-e-sub.h thā lo sub.h bhī hone lagī

soz-e-dil se raushnī hone lagī dil meñ 'nazīr'

ishq kī duniyā bhī duniyā husn kī hone lagī

aas hi se dil mein paida zindagi hone lagi

shama jalne bhi na pai raushni hone lagi

intiha-e-ishq hai kaisi jafa kaisa gila

ab to un ki har KHushi apni KHushi hone lagi

rok apna hath rok ab ai junun-e-jama-dar

husn-e-parda-dar ki parda-dari hone lagi

uljhi uljhi sans ghabrai nazar bahke qadam

ai nigar-e-mast duniya dusri hone lagi

chand mera kahkashan meri gul-o-ghuncha mere

tum mere hone lage duniya meri hone lagi

Dube tare jhilmilai shama shabnam ro paDi

intizar-e-subh tha lo subh bhi hone lagi

soz-e-dil se raushni hone lagi dil mein 'nazir'

ishq ki duniya bhi duniya husn ki hone lagi