aaseb sa jaise mere aasab se nikla

aaseb sā jaise mire a.asāb se niklā

ye kaun dabe paañv mire ḳhvāb se niklā

jab jaal machhere ne sameTā hai alassub.h

TuuTā huā ik chāñd bhī tālāb se niklā

siine meñ dabī chīḳh badan toḌ ke niklī

yādoñ kā dhuāñ ruuh kī mehrāb se niklā

muTThī meñ chhupā.e hue kuchh aks ka.ī raaz

maiñ us kī kahānī ke har ik baab se niklā

āvāz mujhe dene lagī thī mirī miTTī

maiñ ḳhud ko sameTe hue mahtāb se niklā

kuchh tohmat-o-dushnām shikāyāt-o-savālāt

kyā kuchh na miyāñ halqa-e-ahbāb se niklā

aaseb sa jaise mere aasab se nikla

ye kaun dabe panw mere KHwab se nikla

jab jal machhere ne sameTa hai alassubh

TuTa hua ek chand bhi talab se nikla

sine mein dabi chiKH badan toD ke nikli

yaadon ka dhuan ruh ki mehrab se nikla

muTThi mein chhupae hue kuchh aks kai raaz

main us ki kahani ke har ek bab se nikla

aawaz mujhe dene lagi thi meri miTTi

main KHud ko sameTe hue mahtab se nikla

kuchh tohmat-o-dushnam shikayat-o-sawalat

kya kuchh na miyan halqa-e-ahbab se nikla