aashiq-e-gesu-e-duta hun main

āshiq-e-gesū-e-dutā huuñ maiñ

aap apne liye balā huuñ maiñ

kyā shikāyat agar na jaane yaar

ḳhud nahīñ jāntā ki kyā huuñ maiñ

misl-e-gul hañs ke maiñ kabhī na khilā

ġhuncha saañ ziist se ḳhafā huuñ maiñ

maiñ to ai jaan huuñ bure se burā

merā ye muñh kahūñ bhalā huuñ maiñ

dil hai ā.īna-e-do-rū apnā

dost dushman se ek sā huuñ maiñ

terā āshiq huuñ ai but-e-ra.anā

ġhair huuñ maiñ ki āshnā huuñ maiñ

mujh ko taslīm hai jafā-e-yār

har tarah tāba-e-razā huuñ maiñ

mauj-e-nik.hat mirā janāza hai

kushta-e-ḳhanjar-e-adā huuñ maiñ

phir chubhā dil meñ ḳhaar ġham hai 'vaqār'

phir kisī gul kā mubtalā huuñ maiñ

aashiq-e-gesu-e-duta hun main

aap apne liye bala hun main

kya shikayat agar na jaane yar

KHud nahin jaanta ki kya hun main

misl-e-gul hans ke main kabhi na khila

ghuncha san zist se KHafa hun main

main to ai jaan hun bure se bura

mera ye munh kahun bhala hun main

dil hai aaina-e-do-ru apna

dost dushman se ek sa hun main

tera aashiq hun ai but-e-rana

ghair hun main ki aashna hun main

mujh ko taslim hai jafa-e-yar

har tarah taba-e-raza hun main

mauj-e-nikhat mera janaza hai

kushta-e-KHanjar-e-ada hun main

phir chubha dil mein KHar gham hai 'waqar'

phir kisi gul ka mubtala hun main