aashiq ki bhi kaTti hain kya KHub tarah raaten

āshiq kī bhī kaTtī haiñ kyā ḳhuub tarah rāteñ

do-chār ghaḌī ronā do-chār ghaḌī bāteñ

qurbāñ huuñ mujhe jis dam yaad aatī haiñ vo bāteñ

kyā din vo mubārak the kyā ḳhuub thiiñ vo rāteñ

auroñ se chhuTe dilbar dil-dār huve merā

bar-haq haiñ agar pairav kuchh tum meñ karāmāteñ

kal laḌ ga.iiñ kūche meñ āñkhoñ se mirī añkhiyāñ

kuchh zor hī aapas meñ do do huiiñ samghāteñ

kashmīr sī jāgah meñ nā-shukr na rah zāhid

jannat meñ tū ai giidī maare hai ye kyuuñ lāteñ

is ishq ke kūche meñ zāhid tū sañbhal chalnā

kuchh pesh na jāveñgī yaañ terī munājāteñ

us roz miyāñ mil kar nazroñ ko churāte the

tujh yaad meñ hī sājan karte haiñ mudārāteñ

'saudā' ko agar pūchho ahvāl hai ye us kā

do-chār ghaḌī ronā do-chār ghaḌī bāteñ

aashiq ki bhi kaTti hain kya KHub tarah raaten

do-chaar ghaDi rona do-chaar ghaDi baaten

qurban hun mujhe jis dam yaad aati hain wo baaten

kya din wo mubarak the kya KHub thin wo raaten

auron se chhuTe dilbar dil-dar huwe mera

bar-haq hain agar pairaw kuchh tum mein karamaten

kal laD gain kuche mein aankhon se meri ankhiyan

kuchh zor hi aapas mein do do huin samghaten

kashmir si jagah mein na-shukr na rah zahid

jannat mein tu ai gidi mare hai ye kyun laten

is ishq ke kuche mein zahid tu sanbhal chalna

kuchh pesh na jawengi yan teri munajaten

us roz miyan mil kar nazron ko churaate the

tujh yaad mein hi sajan karte hain mudaraaten

'sauda' ko agar puchho ahwal hai ye us ka

do-chaar ghaDi rona do-chaar ghaDi baaten