aashiqi kya har bashar ka kaam hai

āshiqī kyā har bashar kā kaam hai

mere dil mere jigar kā kaam hai

ho harī shāḳh-e-tamannā yā na ho

sīñch denā chashm-e-tar kā kaam hai

baḌh chale paik-e-tasavvur kā qadam

ab yahāñ kyā nāma-bar kā kaam hai

dil mirā le jaane vaalā kaun thā

ye kisī jādū-nazar kā kaam hai

ham se kyā ho vasf qātil kā bayāñ

ye lab-e-zaḳhm-e-jigar kā kaam hai

maut jab aa.e to raahī jaan ho

is safar meñ rāhbar kā kaam hai

faisla hone meñ dushvārī hai kyā

tere ḳhanjar mere sar kā kaam hai

aaj aañsū tum ne poñchhe bhī to kyā

ye to apnā umr bhar kā kaam hai

gul dikhāte haiñ hameñ kyā zaḳhm-e-tan

dil pe khānā koī charkā kaam hai

dil se laa.e lab pe ham āh-o-fuġhāñ

ab tujhe laanā asar kā kaam hai

dar-ba-dar phirte hī guzrī charḳh ko

ye usī bedād-gar kā kaam hai

āñkhoñ āñkhoñ meñ uḌā lete haiñ dil

dilrubā.ī bhī nazar kā kaam hai

teġh kyuuñ chalne meñ bal khāne lagī

ye tirī nāzuk kamar kā kaam hai

siine se kuchh haT ke hai dil kī jagah

is jagah tirchhī nazar kā kaam hai

be-chale hī paañv dete haiñ javāb

manzil-e-ulfat meñ sar kā kaam hai

qudsiyoñ se kaun baazī le gayā

ye bashar hai ye bashar kā kaam hai

motiyoñ se muñh tirā bharnā 'jalīl'

āsif-e-ālī-guhar kā kaam hai

aashiqi kya har bashar ka kaam hai

mere dil mere jigar ka kaam hai

ho hari shaKH-e-tamanna ya na ho

sinch dena chashm-e-tar ka kaam hai

baDh chale paik-e-tasawwur ka qadam

ab yahan kya nama-bar ka kaam hai

dil mera le jaane wala kaun tha

ye kisi jadu-nazar ka kaam hai

hum se kya ho wasf qatil ka bayan

ye lab-e-zaKHm-e-jigar ka kaam hai

maut jab aae to rahi jaan ho

is safar mein rahbar ka kaam hai

faisla hone mein dushwari hai kya

tere KHanjar mere sar ka kaam hai

aaj aansu tum ne ponchhe bhi to kya

ye to apna umr bhar ka kaam hai

gul dikhate hain hamein kya zaKHm-e-tan

dil pe khana koi charka kaam hai

dil se lae lab pe hum aah-o-fughan

ab tujhe lana asar ka kaam hai

dar-ba-dar phirte hi guzri charKH ko

ye usi bedad-gar ka kaam hai

aankhon aankhon mein uDa lete hain dil

dilrubai bhi nazar ka kaam hai

tegh kyun chalne mein bal khane lagi

ye teri nazuk kamar ka kaam hai

sine se kuchh haT ke hai dil ki jagah

is jagah tirchhi nazar ka kaam hai

be-chale hi panw dete hain jawab

manzil-e-ulfat mein sar ka kaam hai

qudsiyon se kaun bazi le gaya

ye bashar hai ye bashar ka kaam hai

motiyon se munh tera bharna 'jalil'

aasif-e-ali-guhar ka kaam hai