aashna-e-dard tu ai KHugar-e-ishrat nahin

āshnā-e-dard tū ai ḳhūgar-e-ishrat nahīñ

lazzat-e-ġham ke barābar dūsrī lazzat nahīñ

qadr-o-qīmat dil kī hai jab tak hai is meñ mauj-e-dard

jis meñ rañg-o-bū us gul kī kuchh vaq.at nahīñ

nāla-e-shab-gīr ho pur-josh ho tūfān-e-ashk

abr-e-bārāñ kī bhī is ke sāmne qīmat nahīñ

lutf-e-dard-e-dil se to hai be-ḳhabar ai chāragar

is jahāñ meñ is se baḌh kar dūsrī ne.amat nahīñ

ye jigar baaqī hai ġham kī mehmānī ke liye

dil subuk-ḳhātir hai is meñ ḳhuun kī rañgat nahīñ

dil diyā hai jis ko vaa.iz hai hameñ us kī talāsh

hūr-e-jannat se shanāsā.ī nahīñ ulfat nahīñ

daulat-e-duniyā-e-dūñ sarchashma-e-afkār hai

bādshāhī ko faqīrī se koī nisbat nahīñ

ziist meñ merī kamī thī ik ġham-e-jāñ-kāh kī

mil gayā qismat se vo bhī ab koī hasrat nahīñ

ho gayā afsos 'hāfiz' nā-murād-e-ārzū

DhūñDhtā hai aur kahīñ taskīn kī sūrat nahīñ

aashna-e-dard tu ai KHugar-e-ishrat nahin

lazzat-e-gham ke barabar dusri lazzat nahin

qadr-o-qimat dil ki hai jab tak hai is mein mauj-e-dard

jis mein rang-o-bu us gul ki kuchh waqat nahin

nala-e-shab-gir ho pur-josh ho tufan-e-ashk

abr-e-baran ki bhi is ke samne qimat nahin

lutf-e-dard-e-dil se to hai be-KHabar ai chaaragar

is jahan mein is se baDh kar dusri neamat nahin

ye jigar baqi hai gham ki mehmani ke liye

dil subuk-KHatir hai is mein KHun ki rangat nahin

dil diya hai jis ko waiz hai hamein us ki talash

hur-e-jannat se shanasai nahin ulfat nahin

daulat-e-duniya-e-dun sarchashma-e-afkar hai

baadshahi ko faqiri se koi nisbat nahin

zist mein meri kami thi ek gham-e-jaan-kah ki

mil gaya qismat se wo bhi ab koi hasrat nahin

ho gaya afsos 'hafiz' na-murad-e-arzu

DhunDhta hai aur kahin taskin ki surat nahin