aashna gosh se us gul ke suKHan hai kis ka

āshnā gosh se us gul ke suḳhan hai kis kā

kuchh zabāñ se kahe koī ye dahan hai kis kā

peshtar hashr se hotī hai qayāmat barpā

jo chalan chalte haiñ ḳhush-qad ye chalan hai kis kā

dast-e-qudrat ne banāyā hai tujhe ai mahbūb

aisā Dhālā huā sāñche meñ badan hai kis kā

kis tarah tum se na māñgeñ tumhīñ insāf karo

bosa lene kā sazā-vār dahan hai kis kā

shādi-e-marg se phūlā maiñ samāne kā nahīñ

gor kahte haiñ kise naam kafan hai kis kā

dahan-e-tañg hai mauhūm yaqīñ hai kis ko

kamar-e-yār hai ma.adūm ye zan hai kis kā

mufside jo ki hoñ us chashm-e-siyah se kam haiñ

fitna-pardāzī jise kahte haiñ fan hai kis kā

ek aalam ko tire ishq meñ saktā hogā

saaf ā.īna se shaffāf badan hai kis kā

husn se dil to lagā ishq kā bīmār to ho

phir ye unnāb-e-lab o seb-e-zaqan hai kis kā

gulshan-e-husn se behtar koī gulzār nahīñ

sumbul is tarah kā pur-pech-o-shikan hai kis kā

bāġh-e-ālam kā har ik gul hai ḳhudā kī qudrat

bāġhbāñ kaun hai is kā ye chaman hai kis kā

ḳhaak meñ us ko milā.ūñ use barbād karūñ

jaan kis kī hai mirī jaan ye tan hai kis kā

sarv sā qad hai nahīñ madd-e-nazar kā mere

gul sā ruḳh kis kā hai ġhuncha sā dahan hai kis kā

kyuuñ na be-sāḳhta bande hoñ dil-o-jāñ se nisār

qudrat allāh kī be-sāḳhta-pan hai kis kā

aaj hī chhūTe jo chhuTtā ye ḳharāba kal ho

ham ġharīboñ ko hai kyā ġham ye vatan hai kis kā

yaar ko tum se mohabbat nahīñ to ai 'ātish'

ḳhat meñ alqāb ye phir mushfiq-e-man hai kis kā

aashna gosh se us gul ke suKHan hai kis ka

kuchh zaban se kahe koi ye dahan hai kis ka

peshtar hashr se hoti hai qayamat barpa

jo chalan chalte hain KHush-qad ye chalan hai kis ka

dast-e-qudrat ne banaya hai tujhe ai mahbub

aisa Dhaala hua sanche mein badan hai kis ka

kis tarah tum se na mangen tumhin insaf karo

bosa lene ka saza-war dahan hai kis ka

shadi-e-marg se phula main samane ka nahin

gor kahte hain kise nam kafan hai kis ka

dahan-e-tang hai mauhum yaqin hai kis ko

kamar-e-yar hai madum ye zan hai kis ka

mufside jo ki hon us chashm-e-siyah se kam hain

fitna-pardazi jise kahte hain fan hai kis ka

ek aalam ko tere ishq mein sakta hoga

saf aaina se shaffaf badan hai kis ka

husn se dil to laga ishq ka bimar to ho

phir ye unnab-e-lab o seb-e-zaqan hai kis ka

gulshan-e-husn se behtar koi gulzar nahin

sumbul is tarah ka pur-pech-o-shikan hai kis ka

bagh-e-alam ka har ek gul hai KHuda ki qudrat

baghban kaun hai is ka ye chaman hai kis ka

KHak mein us ko milaun use barbaad karun

jaan kis ki hai meri jaan ye tan hai kis ka

sarw sa qad hai nahin madd-e-nazar ka mere

gul sa ruKH kis ka hai ghuncha sa dahan hai kis ka

kyun na be-saKHta bande hon dil-o-jaan se nisar

qudrat allah ki be-saKHta-pan hai kis ka

aaj hi chhuTe jo chhuTta ye KHaraba kal ho

hum gharibon ko hai kya gham ye watan hai kis ka

yar ko tum se mohabbat nahin to ai 'atish'

KHat mein alqab ye phir mushfiq-e-man hai kis ka