aashna ho kar bhi usne mujhko pahchana na tha

āshnā ho kar bhī us ne mujh ko pahchānā na thā

us ke is bartāv kā kuchh mujh ko andāza na thā

aise ik tapte safar kī dāstāñ thī zindagī

dhuup thī saa.e meñ lekin dhuup meñ saaya na thā

kyā kahūñ tujh se bichhaḌ kar zindagī kaise kaTī

harkateñ kartī thī sāñseñ aur maiñ zinda na thā

gir gayā kyuuñ yak-ba-yak taarā zamīñ par TuuT kar

āsmāñ dekhā thā maiñ ne aur kuchh māñgā na thā

ham-zabāñ sab the nadārat bhiiḌ ke us shahr meñ

gird mere buildingeñ thī koī ham-sāya na thā

phir bhī us rishte ko maiñ ne TuuT kar chāhā 'pavan'

vo ki jis rishte se merā koī bhī naata na thā

aashna ho kar bhi us ne mujh ko pahchana na tha

us ke is bartaw ka kuchh mujh ko andaza na tha

aise ek tapte safar ki dastan thi zindagi

dhup thi sae mein lekin dhup mein saya na tha

kya kahun tujh se bichhaD kar zindagi kaise kaTi

harkaten karti thi sansen aur main zinda na tha

gir gaya kyun yak-ba-yak tara zamin par TuT kar

aasman dekha tha main ne aur kuchh manga na tha

ham-zaban sab the nadarat bhiD ke us shahr mein

gird mere buildingen thi koi ham-saya na tha

phir bhi us rishte ko main ne TuT kar chaha 'pawan'

wo ki jis rishte se mera koi bhi nata na tha