aashna shakl na-ashna aadmi

āshnā shakl nā-āshnā aadmī

ḳhud-farebī meñ hai mubtalā aadmī

jaane kin kin ināyāt se TuuT kar

jheltā hai shikast-e-anā aadmī

kitnā mushkil hai mardum-shanāsī kā fan

kitnā ghāyal thā vo masḳhara aadmī

kis se ahvāl kī koī pursish kare

dauḌtā bhāgtā hādsa aadmī

ik habāb-e-ravāñ mauj-e-sayyāl par

hai magar kis qadar ḳhud-numā aadmī

yuuñ ta.alluq-shikan hai ye tahzīb-e-nau

ban gayā ik jazīra-numā aadmī

DhūñD laa.e the dair-o-haram se abhī

phir kahāñ kho gayā sar-phirā aadmī

apne maslak kā vo āḳhirī fard thā

khoTī duniyā meñ 'afzal' kharā aadmī

aashna shakl na-ashna aadmi

KHud-farebi mein hai mubtala aadmi

jaane kin kin inayat se TuT kar

jhelta hai shikast-e-ana aadmi

kitna mushkil hai mardum-shanasi ka fan

kitna ghayal tha wo masKHara aadmi

kis se ahwal ki koi pursish kare

dauDta bhagta hadsa aadmi

ek habab-e-rawan mauj-e-sayyal par

hai magar kis qadar KHud-numa aadmi

yun talluq-shikan hai ye tahzib-e-nau

ban gaya ek jazira-numa aadmi

DhunD lae the dair-o-haram se abhi

phir kahan kho gaya sar-phira aadmi

apne maslak ka wo aaKHiri fard tha

khoTi duniya mein 'afzal' khara aadmi