aashufta-nawai se apni duniya ko jagata jata hun

āshufta-navā.ī se apnī duniyā ko jagātā jaatā huuñ

dīvāna huuñ dīvānoñ ko maiñ hosh meñ laatā jaatā huuñ

ummīd kī sham.eñ rah rah kar maiñ dil meñ jalātā jaatā huuñ

jab jal chuktī haiñ ye sham.eñ phir sab ko bujhātā jaatā huuñ

tum dekh rahe ho maiḳhāne meñ jur.at-e-rindāna merī

maiñ ḳhud bhī piitā jaatā huuñ tum ko bhī pilātā jaatā huuñ

takmīl-e-mohabbat kartā huuñ kuchh garmī se kuchh narmī se

aaheñ bhī bhartā jaatā huuñ aañsū bhī bahātā jaatā huuñ

be-kār sahī naale mere be-sūd sahī aaheñ merī

maiñ un kī nigāhoñ meñ lekin phir bhī to samātā jaatā huuñ

haañ sāz-e-shikasta meñ mere naġhmoñ kā talātum pinhāñ hai

shorīda-navā.ī se apnī mahfil par chhātā jaatā huuñ

maiñ sa.ī-e-musalsal kar ke bhī manzil se kosoñ duur rahā

manzil na milī to kyā hai magar apne ko paatā jaatā huuñ

ummīd-e-vafā ke pesh-e-nazar maiñ un kī jafā.eñ bhuul gayā

hai mustaqbil par aañkh mirī maazī ko bhulātā jaatā huuñ

qudrat bhī muhayyā kartī hai ab mere liye ibrat ke sabaq

har gaam pe Thokar khātā huuñ aur hosh meñ aatā jaatā huuñ

'najmī' ye ḳhamoshī bhī merī kuchh vaj.h-e-sukūn-e-dil na huī

maiñ zabt-e-fuġhāñ se dard ko apne aur baḌhātā jaatā huuñ

aashufta-nawai se apni duniya ko jagata jata hun

diwana hun diwanon ko main hosh mein lata jata hun

ummid ki shamen rah rah kar main dil mein jalata jata hun

jab jal chukti hain ye shamen phir sab ko bujhata jata hun

tum dekh rahe ho maiKHane mein jurat-e-rindana meri

main KHud bhi pita jata hun tum ko bhi pilata jata hun

takmil-e-mohabbat karta hun kuchh garmi se kuchh narmi se

aahen bhi bharta jata hun aansu bhi bahata jata hun

be-kar sahi nale mere be-sud sahi aahen meri

main un ki nigahon mein lekin phir bhi to samata jata hun

han saz-e-shikasta mein mere naghmon ka talatum pinhan hai

shorida-nawai se apni mahfil par chhata jata hun

main sai-e-musalsal kar ke bhi manzil se koson dur raha

manzil na mili to kya hai magar apne ko pata jata hun

ummid-e-wafa ke pesh-e-nazar main un ki jafaen bhul gaya

hai mustaqbil par aankh meri mazi ko bhulata jata hun

qudrat bhi muhayya karti hai ab mere liye ibrat ke sabaq

har gam pe Thokar khata hun aur hosh mein aata jata hun

'najmi' ye KHamoshi bhi meri kuchh wajh-e-sukun-e-dil na hui

main zabt-e-fughan se dard ko apne aur baDhata jata hun