aasman aasman panw dharte gae din guzarte gae

āsmāñ āsmāñ paañv dharte ga.e din guzarte ga.e

ham sitāroñ ko bajre meñ bharte ga.e din guzarte ga.e

rāh-e-pur-ḳhār ke ābla-pā musāfir the ik dhyān meñ

reg-e-imroz par phuul dharte ga.e din guzarte ga.e

vaqt kī shāḳh par zard mausam khilā aur havā chal paḌī

duur tak ḳhushk patte bikharte ga.e din guzarte ga.e

ek chiḌiyā kathā koī kahtī rahī naav bahtī rahī

aur māñjhī se ham baat karte ga.e din guzarte ga.e

kitnī duniyāoñ se kitnī duniyāoñ tak gard ke bāvajūd

naqsh se aa.ine meñ Thaharte ga.e din guzarte ga.e

bichh ga.ī ek shab chār-sū ik bisāt-e-havā aur ham

apnī har saañs par saañs harte ga.e din guzarte ga.e

jis qadar ḳhvāb the maT-mile pāniyoñ meñ bahe aur phir

dil tarā.ī meñ 'at.har' utarte ga.e din guzarte ga.e

aasman aasman panw dharte gae din guzarte gae

hum sitaron ko bajre mein bharte gae din guzarte gae

rah-e-pur-KHar ke aabla-pa musafir the ek dhyan mein

reg-e-imroz par phul dharte gae din guzarte gae

waqt ki shaKH par zard mausam khila aur hawa chal paDi

dur tak KHushk patte bikharte gae din guzarte gae

ek chiDiya katha koi kahti rahi naw bahti rahi

aur manjhi se hum baat karte gae din guzarte gae

kitni duniyaon se kitni duniyaon tak gard ke bawajud

naqsh se aaine mein Thaharte gae din guzarte gae

bichh gai ek shab chaar-su ek bisat-e-hawa aur hum

apni har sans par sans harte gae din guzarte gae

jis qadar KHwab the maT-mile paniyon mein bahe aur phir

dil tarai mein 'athar' utarte gae din guzarte gae