aasman sar pe uThaya bhi nahin jaega

āsmāñ sar pe uThāyā bhī nahīñ jā.egā

haañ magar us ko bhulāyā bhī nahīñ jā.egā

hausla apnī jagah Thiik hai lekin ham se

dūsrā ishq nibhāyā bhī nahīñ jā.egā

shikva-e-zulmat-e-shab ḳhuub kiyā jā.egā

ik diyā ḳhud kā jalāyā bhī nahīñ jā.egā

ḳhaak us shaḳhs se ta.abīr pe asrār kareñ

jis se kuchh ḳhvāb dikhāyā bhī nahīñ jā.egā

tum ne achchhā hī kiyā tark-e-mohabbat kar ke

tum se ye misrā uThāyā bhī nahīñ jā.egā

vo bhī mumkin hai na aane ke bahāne DhūñDe

aur ab ham se bulāyā bhī nahīñ jā.egā

pūchhne aa.e haiñ ahvāl vo 'abdul-qādir'

kyā batā.eñ ki batāyā bhī nahīñ jā.egā

aasman sar pe uThaya bhi nahin jaega

han magar us ko bhulaya bhi nahin jaega

hausla apni jagah Thik hai lekin hum se

dusra ishq nibhaya bhi nahin jaega

shikwa-e-zulmat-e-shab KHub kiya jaega

ek diya KHud ka jalaya bhi nahin jaega

KHak us shaKHs se tabir pe asrar karen

jis se kuchh KHwab dikhaya bhi nahin jaega

tum ne achchha hi kiya tark-e-mohabbat kar ke

tum se ye misra uThaya bhi nahin jaega

wo bhi mumkin hai na aane ke bahane DhunDe

aur ab hum se bulaya bhi nahin jaega

puchhne aae hain ahwal wo 'abdul-qadir'

kya bataen ki bataya bhi nahin jaega