aasman tak jo nala pahuncha hai

āsmāñ tak jo naala pahuñchā hai

dil kī gahrā.iyoñ se niklā hai

merī nazroñ meñ hashr bhī kyā hai

maiñ ne un kā jalāl dekhā hai

jalva-e-tūr ḳhvāb-e-mūsā hai

kis ne dekhā hai kis ko dekhā hai

haa.e anjām is safīne kā

nāḳhudā ne jise Duboyā hai

aah kyā dil meñ ab lahū bhī nahīñ

aaj ashkoñ kā rañg phīkā hai

jab bhī āñkheñ milīñ un āñkhoñ se

dil ne dil kā mizāj pūchhā hai

vo javānī ki thī harīf-e-tarab

aaj barbād-e-jām-o-sahbā hai

kaun uTh kar chalā muqābil se

jis taraf dekhiye añdherā hai

phir mirī aañkh ho ga.ī namnāk

phir kisī ne mizāj pūchhā hai

sach to ye hai 'majāz' kī duniyā

husn aur ishq ke sivā kyā hai

aasman tak jo nala pahuncha hai

dil ki gahraiyon se nikla hai

meri nazron mein hashr bhi kya hai

main ne un ka jalal dekha hai

jalwa-e-tur KHwab-e-musa hai

kis ne dekha hai kis ko dekha hai

hae anjam is safine ka

naKHuda ne jise Duboya hai

aah kya dil mein ab lahu bhi nahin

aaj ashkon ka rang phika hai

jab bhi aankhen milin un aankhon se

dil ne dil ka mizaj puchha hai

wo jawani ki thi harif-e-tarab

aaj barbaad-e-jam-o-sahba hai

kaun uTh kar chala muqabil se

jis taraf dekhiye andhera hai

phir meri aankh ho gai namnak

phir kisi ne mizaj puchha hai

sach to ye hai 'majaz' ki duniya

husn aur ishq ke siwa kya hai