aate hain kitne KHwab tere roz-o-shab mujhe

aate haiñ kitne ḳhvāb tire roz-o-shab mujhe

vahshat sī hone lagtī hai koī ajab mujhe

tum ko maiñ gar qubūl huuñ aise hī Thiik huuñ

aatā nahīñ sañvarne kā koī bhī Dhab mujhe

zālim hai bādshah ki hai sab pe furāt band

mahsūs ho rahe haiñ sabhī sūkhe lab mujhe

bas kuchh dinoñ kī baat hai maiñ lauT ā.ūñgī

hargiz sadā na de koī pīchhe se ab mujhe

ye dekhnā hai kaun mirā is jahān meñ

yāqūb kī to āñkheñ atā kar ai rab mujhe

vo shaḳhs jab ki ab to mirī dastaras meñ hai

karnī nahīñ hai aur kisī kī talab mujhe

bāñdī kī tarah qaid huuñ us ke huzūr maiñ

vo bādshah hai aur milegā hī kab mujhe

aate hain kitne KHwab tere roz-o-shab mujhe

wahshat si hone lagti hai koi ajab mujhe

tum ko main gar qubul hun aise hi Thik hun

aata nahin sanwarne ka koi bhi Dhab mujhe

zalim hai baadshah ki hai sab pe furaat band

mahsus ho rahe hain sabhi sukhe lab mujhe

bas kuchh dinon ki baat hai main lauT aaungi

hargiz sada na de koi pichhe se ab mujhe

ye dekhna hai kaun mera is jahan mein

yaqub ki to aankhen ata kar ai rab mujhe

wo shaKHs jab ki ab to meri dastaras mein hai

karni nahin hai aur kisi ki talab mujhe

bandi ki tarah qaid hun us ke huzur main

wo baadshah hai aur milega hi kab mujhe