aati hai zindagi mein KHizan bhi bahaar bhi

aatī hai zindagī meñ ḳhizāñ bhī bahār bhī

sehn-e-chaman meñ phuul bhī hote haiñ ḳhaar bhī

nārāzgī na ho to mohabbat hai be-maza

hastī ḳhushī bhī ġham bhī hai nafrat bhī pyaar bhī

be-e'tinā.iyoñ meñ bhī hai chāshnī kā lutf

hotā hai iltifāt kabhī nāgavār bhī

chhoḌā na ḳhauf-e-hijr ne dāman tamām raat

āġhosh-e-pur-sukūñ meñ thā dil be-qarār bhī

armāñ kā ḳhuuñ samāj kī talvār ne kiyā

majbūr maslahat se huā iḳhtiyār bhī

mehnat kī saḳht dhuup meñ pīpal kī chhāñv meñ

hai dasht-e-ġham meñ abr-e-karam kī phuvār bhī

har-chand be-dareġh bahā ḳhūn-e-ārzū

lekin huā hai dāman-e-dil lāla-zār bhī

ganjīna-e-sifāt hai us kī har ek baat

sūrat bhī guftugū bhī adā bhī shi.ār bhī

añgūr ke ye baaġh lab-e-jū ye chahchahe

hogā yahīñ kahīñ pe hamārā mazār bhī

'jāmī' pe kyā banegī ḳhudā jaane hashr meñ

jannat kī aarzū hai gunāhoñ se pyaar bhī

aati hai zindagi mein KHizan bhi bahaar bhi

sehn-e-chaman mein phul bhi hote hain KHar bhi

naraazgi na ho to mohabbat hai be-maza

hasti KHushi bhi gham bhi hai nafrat bhi pyar bhi

be-e'tinaiyon mein bhi hai chashni ka lutf

hota hai iltifat kabhi nagawar bhi

chhoDa na KHauf-e-hijr ne daman tamam raat

aaghosh-e-pur-sukun mein tha dil be-qarar bhi

arman ka KHun samaj ki talwar ne kiya

majbur maslahat se hua iKHtiyar bhi

mehnat ki saKHt dhup mein pipal ki chhanw mein

hai dasht-e-gham mein abr-e-karam ki phuwar bhi

har-chand be-daregh baha KHun-e-arzu

lekin hua hai daman-e-dil lala-zar bhi

ganjina-e-sifat hai us ki har ek baat

surat bhi guftugu bhi ada bhi shiar bhi

angur ke ye bagh lab-e-ju ye chahchahe

hoga yahin kahin pe hamara mazar bhi

'jami' pe kya banegi KHuda jaane hashr mein

jannat ki aarzu hai gunahon se pyar bhi