aatish-e-husn se ek aab hai ruKHsaron mein

ātish-e-husn se ik aab hai ruḳhsāroñ meñ

ai tirī shaan ki paanī bhī hai añgāroñ meñ

dam nikal jā.egā ruḳhsat kā abhī naam na lo

tum jo uTThe to biThā dūñgā azādāroñ meñ

jā ke ab nār-e-jahannam kī ḳhabar le zāhid

naddiyāñ bah ga.iiñ ashkoñ kī gunahgāroñ meñ

naubateñ nāla-e-ruḳhsat kā patā detī haiñ

mātam-e-ishq kī āvāz hai naqqāroñ meñ

mujh ko is dard kī thoḌī sī kasak hai darkār

jo davā ban ke baTā hai tire bīmāroñ meñ

be-talab us ne dikhāyā ruḳh-e-raushan 'muztar'

naam muusā kā nahīñ us ke talab-gāroñ meñ

aatish-e-husn se ek aab hai ruKHsaron mein

ai teri shan ki pani bhi hai angaron mein

dam nikal jaega ruKHsat ka abhi nam na lo

tum jo uTThe to biTha dunga azadaron mein

ja ke ab nar-e-jahannam ki KHabar le zahid

naddiyan bah gain ashkon ki gunahgaron mein

naubaten nala-e-ruKHsat ka pata deti hain

matam-e-ishq ki aawaz hai naqqaron mein

mujh ko is dard ki thoDi si kasak hai darkar

jo dawa ban ke baTa hai tere bimaron mein

be-talab us ne dikhaya ruKH-e-raushan 'muztar'

nam musa ka nahin us ke talab-garon mein