aawargi ne dil ki ajab kaam kar diya

āvārgī ne dil kī ajab kaam kar diyā

ḳhvāboñ ko bojh nīñdoñ ko ilzām kar diyā

kuchh aañsū apne pyaar kī pahchān ban ga.e

kuchh āñsuoñ ne pyaar ko bad-nām kar diyā

jis ko bachā.e rakhne meñ ajdād bik ga.e

ham ne usī havelī ko nīlām kar diyā

dil ko bachā ke rakkhā thā duniyā se aaj tak

le aaj ham ne ye bhī tire naam kar diyā

tum ne nazar jhukā ke jahāñ baat kaaT dī

ham ne vahīñ fasāne kā anjām kar diyā

aawargi ne dil ki ajab kaam kar diya

KHwabon ko bojh nindon ko ilzam kar diya

kuchh aansu apne pyar ki pahchan ban gae

kuchh aansuon ne pyar ko bad-nam kar diya

jis ko bachae rakhne mein ajdad bik gae

hum ne usi haweli ko nilam kar diya

dil ko bacha ke rakkha tha duniya se aaj tak

le aaj hum ne ye bhi tere nam kar diya

tum ne nazar jhuka ke jahan baat kaT di

hum ne wahin fasane ka anjam kar diya