aawe KHizan chaman ki taraf gar main ru karun

aave ḳhizāñ chaman kī taraf gar maiñ rū karūñ

ġhuncha kare guloñ ko sabā gar maiñ bū karūñ

āzurda is chaman meñ huuñ mānind-e-barg-e-ḳhushk

chheḌe jo Tuk nasīm mujhe sau ġhulū karūñ

āñkhoñ se jaa.e ashk girīñ gul chaman chaman

manzūr girya gar maiñ tirā rañg-o-bū karūñ

aayā huuñ pāra-dozī-e-dil se nipaT ba-tañg

aise phaTe hue ko maiñ kab tak rafū karūñ

kyā aarzū ki ḳhaak meñ apnī mileñ na yaañ

kis rū se ab falak se maiñ kuchh aarzū karūñ

kahtā hai aa.ina ki hai tujh sā hī ek aur

bāvar nahīñ to lā maiñ tire rū-ba-rū karūñ

saare hī is chaman se havā-ḳhvāh uTh ga.e

ro.uuñ guloñ ko yā maiñ ġham-e-rañg-o-bū karūñ

'qā.em' ye jī meñ hai ki taqayyud se shaiḳh kī

ab ke jo maiñ namāz karūñ be-vazū karūñ

aawe KHizan chaman ki taraf gar main ru karun

ghuncha kare gulon ko saba gar main bu karun

aazurda is chaman mein hun manind-e-barg-e-KHushk

chheDe jo Tuk nasim mujhe sau ghulu karun

aankhon se jae ashk girin gul chaman chaman

manzur girya gar main tera rang-o-bu karun

aaya hun para-dozi-e-dil se nipaT ba-tang

aise phaTe hue ko main kab tak rafu karun

kya aarzu ki KHak mein apni milen na yan

kis ru se ab falak se main kuchh aarzu karun

kahta hai aaina ki hai tujh sa hi ek aur

bawar nahin to la main tere ru-ba-ru karun

sare hi is chaman se hawa-KHwah uTh gae

roun gulon ko ya main gham-e-rang-o-bu karun

'qaem' ye ji mein hai ki taqayyud se shaiKH ki

ab ke jo main namaz karun be-wazu karun