aaya hai KHayal-e-be-wafai

aayā hai ḳhayāl-e-be-vafā.ī

kyuuñ jī vahī guftugū phir aa.ī

o but na sunegā koī merī

kyā terī hī ho ga.ī ḳhudā.ī

roko roko zabān roko

dene na lago kahīñ duhā.ī

sahrā meñ huī guhar-fishānī

kaam aa.ī mirī barahna-pā.ī

chāhā lekin na bach sake ham

āḳhir teġh-e-nigāh khaa.ī

toḌā kāñToñ ne ābloñ ko

barbād huī mirī kamā.ī

bosa ham aaj māñgte haiñ

karte haiñ qismat-āzmā.ī

tauba-shikanī shabāb meñ kar

kab tak ai jān-e-pārsā.ī

kaaTā din to taḌap taḌap kar

aafat kī raat sar par aa.ī

ruḳhsat hai 'nasīm' jald dekho

kar lo gar ho sake bhalā.ī

aaya hai KHayal-e-be-wafai

kyun ji wahi guftugu phir aai

o but na sunega koi meri

kya teri hi ho gai KHudai

roko roko zaban roko

dene na lago kahin duhai

sahra mein hui guhar-fishani

kaam aai meri barahna-pai

chaha lekin na bach sake hum

aaKHir tegh-e-nigah khai

toDa kanTon ne aablon ko

barbaad hui meri kamai

bosa hum aaj mangte hain

karte hain qismat-azmai

tauba-shikani shabab mein kar

kab tak ai jaan-e-parsai

kaTa din to taDap taDap kar

aafat ki raat sar par aai

ruKHsat hai 'nasim' jald dekho

kar lo gar ho sake bhalai