aaya jo tera zikr jigar chaak ho gaya

aayā jo terā zikr jigar chaak ho gayā

maiñ shām-e-hijr aur bhī ġhamnāk ho gayā

vo chashm-e-nāz DhūñDhtī rahtī hai mujh meñ kyā

shīsha thā ḳhvāb-e-vasl kā jo ḳhaak ho gayā

ham ḳhud harīs-e-lazzat-e-āzār ho ga.e

qissa tirī jafāoñ kā sab paak ho gayā

ab 'ishq meñ chhupī huī lālach hai dahr kī

majnūñ bhī is zamāne kā chālāk ho gayā

maz.hab se us ke dil meñ na paidā huā gudāz

ye aadmī to aur bhī saffāk ho gayā

insāñ ne inkisār ko jab tark kar diyā

apnī anā kī aap hī ḳhūrāk ho gayā

be-maslahat thā pahle bhī 'jā'far' kalām meñ

tere karam se aur bhī bebāk ho gayā

aaya jo tera zikr jigar chaak ho gaya

main sham-e-hijr aur bhi ghamnak ho gaya

wo chashm-e-naz DhunDhti rahti hai mujh mein kya

shisha tha KHwab-e-wasl ka jo KHak ho gaya

hum KHud haris-e-lazzat-e-azar ho gae

qissa teri jafaon ka sab pak ho gaya

ab 'ishq mein chhupi hui lalach hai dahr ki

majnun bhi is zamane ka chaalak ho gaya

mazhab se us ke dil mein na paida hua gudaz

ye aadmi to aur bhi saffak ho gaya

insan ne inkisar ko jab tark kar diya

apni ana ki aap hi KHurak ho gaya

be-maslahat tha pahle bhi 'ja'far' kalam mein

tere karam se aur bhi bebak ho gaya