aaya na ras nala-e-dil ka asar mujhe

aayā na raas nāla-e-dil kā asar mujhe

ab tum mile to kuchh nahīñ apnī ḳhabar mujhe

dil le ke mujh se dete ho dāġh-e-jigar mujhe

ye baat bhūlne kī nahīñ umr bhar mujhe

har-sū dikhā.ī dete haiñ vo jalva-gar mujhe

kyā kyā fareb detī hai merī nazar mujhe

miltī nahīñ hai lazzat-e-dard-e-jigar mujhe

bhūlī huī na ho nigah-e-fitnagar mujhe

Daalā hai be-ḳhudī ne ajab raah par mujhe

āñkheñ haiñ aur kuchh nahīñ aatā nazar mujhe

karnā hai aaj hazrat-e-nāseh se sāmnā

mil jaa.e do ghaḌī ko tumhārī nazar mujhe

mastāna kar rahā huuñ rah-e-āshiqī ko tai

le jaa.e jazb-e-shauq mirā ab jidhar mujhe

Dartā huuñ jalva-e-ruḳh-e-jānāñ ko dekh kar

apnā banā na le kahīñ merī nazar mujhe

yaksāñ hai husn-o-ishq kī sar-mastiyoñ kā rañg

un kī ḳhabar unheñ hai na merī ḳhabar mujhe

marnā hai un ke paañv pe rakh kar sar-e-niyāz

karnā hai aaj qissa-e-ġham muḳhtasar mujhe

siine se dil aziiz hai dil se ho tum aziiz

sab se magar aziiz hai terī nazar mujhe

maiñ duur huuñ to rū-e-suḳhan mujh se kis liye

tum paas ho to kyuuñ nahīñ aate nazar mujhe

kyā jāniye qafas meñ rahe kyā mo.āmla

ab tak to haiñ aziiz mire bāl-o-par mujhe

aaya na ras nala-e-dil ka asar mujhe

ab tum mile to kuchh nahin apni KHabar mujhe

dil le ke mujh se dete ho dagh-e-jigar mujhe

ye baat bhulne ki nahin umr bhar mujhe

har-su dikhai dete hain wo jalwa-gar mujhe

kya kya fareb deti hai meri nazar mujhe

milti nahin hai lazzat-e-dard-e-jigar mujhe

bhuli hui na ho nigah-e-fitnagar mujhe

Dala hai be-KHudi ne ajab rah par mujhe

aankhen hain aur kuchh nahin aata nazar mujhe

karna hai aaj hazrat-e-naseh se samna

mil jae do ghaDi ko tumhaari nazar mujhe

mastana kar raha hun rah-e-ashiqi ko tai

le jae jazb-e-shauq mera ab jidhar mujhe

Darta hun jalwa-e-ruKH-e-jaanan ko dekh kar

apna bana na le kahin meri nazar mujhe

yaksan hai husn-o-ishq ki sar-mastiyon ka rang

un ki KHabar unhen hai na meri KHabar mujhe

marna hai un ke panw pe rakh kar sar-e-niyaz

karna hai aaj qissa-e-gham muKHtasar mujhe

sine se dil aziz hai dil se ho tum aziz

sab se magar aziz hai teri nazar mujhe

main dur hun to ru-e-suKHan mujh se kis liye

tum pas ho to kyun nahin aate nazar mujhe

kya jaaniye qafas mein rahe kya moamla

ab tak to hain aziz mere baal-o-par mujhe