aazadi ka manzar achchha lagta hai

āzādī kā manzar achchhā lagtā hai

shīsh mahal se chhappar achchhā lagtā hai

taaj amīr-e-shahr mubārak ho tujh ko

dīvānoñ ko patthar achchhā lagtā hai

bachpan kab kā biit chukā phir bhī mujh ko

maañ ke haath kā bistar achchhā lagtā hai

mere lahū ko paanī kī ab chaah kahāñ

ḳhushk gale par ḳhanjar achchhā lagtā hai

terī yaad kā chāñd nikaltā hai jis dam

mujh ko akele shab bhar achchhā lagtā hai

apnoñ meñ tanhā.ī kā ab ehsās na pūchh

ghar vāloñ se be-ghar achchhā lagtā hai

kaun hai kis pe nazr kareñ ham sar apnā

ham ko terā sañg-e-dar achchhā lagtā hai

apnī zaat ke andar kab tak qaid rahūñ

mujh ko ḳhud se bāhar achchhā lagtā hai

maañ ke haath ke bhaat ke lazzat mat pūchho

saath meñ us ke kañkar achchhā lagtā hai

himmat hai to dushman se bhī pyaar karo

yuuñ to sab ko dilbar achchhā lagtā hai

jab bhī namāz-e-fazr adā kar lete haiñ

qasam ḳhudā kī din bhar achchhā lagtā hai

varna pyaas hī dil ko bahlātī hai 'halīm'

tere naam kā sāġhar achchhā lagtā hai

aazadi ka manzar achchha lagta hai

shish mahal se chhappar achchha lagta hai

taj amir-e-shahr mubarak ho tujh ko

diwanon ko patthar achchha lagta hai

bachpan kab ka bit chuka phir bhi mujh ko

man ke hath ka bistar achchha lagta hai

mere lahu ko pani ki ab chah kahan

KHushk gale par KHanjar achchha lagta hai

teri yaad ka chand nikalta hai jis dam

mujh ko akele shab bhar achchha lagta hai

apnon mein tanhai ka ab ehsas na puchh

ghar walon se be-ghar achchha lagta hai

kaun hai kis pe nazr karen hum sar apna

hum ko tera sang-e-dar achchha lagta hai

apni zat ke andar kab tak qaid rahun

mujh ko KHud se bahar achchha lagta hai

man ke hath ke bhat ke lazzat mat puchho

sath mein us ke kankar achchha lagta hai

himmat hai to dushman se bhi pyar karo

yun to sab ko dilbar achchha lagta hai

jab bhi namaz-e-fazr ada kar lete hain

qasam KHuda ki din bhar achchha lagta hai

warna pyas hi dil ko bahlati hai 'halim'

tere nam ka saghar achchha lagta hai