aazar-e-dil se rang-e-tabiat badal gaya

āzār-e-dil se rañg-e-tabī.at badal gayā

āḳhir dimāġh fikr-e-musalsal se chal gayā

jalva hazār pardoñ meñ chhuptā nahīñ kabhī

tāb-e-ruḳh-e-nigār se ghūñghaT hī jal gayā

da.avā karūñgā dāvar-e-mahshar ke sāmne

duniyā se merī terī kashākash kā hal gayā

afkār tere husn kī jādūgarī sanam

har sher terī zulf kī ḳhushbū meñ Dhal gayā

kal zindagī se apnī kuchh aise ḳhafā thā maiñ

tum ne ye samjhā siine se armāñ nikal gayā

āvārgī le jaa.e hai jaane kahāñ kahāñ

niklā maiñ sahrā se jūñhī sū-e-jabal gayā

uThtā hai dard pahlū meñ goyā nahīñ hai dil

jaadū kisī kī shoḳh nigāhoñ kā chal gayā

haiñ bul-havas hazāroñ koī ahl-e-dil nahīñ

ab rasm-e-āshiqī se bhī husn-e-amal gayā

daa.im shab-e-firāq meñ sho.ale se ishq ke

misl-e-charāġh dāġh-e-dil-e-ḳhasta jal gayā

kyā us ke jī meñ aa.ī ki muddat ke ba.ad yaar

khulne lagā thā ham se va-lekin sambhal gayā

āshuftagī se mere dil-e-nā-tavāñ kā haal

bigḌā ḳhudāyā aisā mirā dam nikal gayā

fariyād-e-sho.ala-bār ne kyā kyā ġhazab kiye

jāveñ kahāñ 'jalālī' chaman saarā jal gayā

aazar-e-dil se rang-e-tabiat badal gaya

aaKHir dimagh fikr-e-musalsal se chal gaya

jalwa hazar pardon mein chhupta nahin kabhi

tab-e-ruKH-e-nigar se ghunghaT hi jal gaya

dawa karunga dawar-e-mahshar ke samne

duniya se meri teri kashakash ka hal gaya

afkar tere husn ki jadugari sanam

har sher teri zulf ki KHushbu mein Dhal gaya

kal zindagi se apni kuchh aise KHafa tha main

tum ne ye samjha sine se arman nikal gaya

aawargi le jae hai jaane kahan kahan

nikla main sahra se junhi su-e-jabal gaya

uThta hai dard pahlu mein goya nahin hai dil

jadu kisi ki shoKH nigahon ka chal gaya

hain bul-hawas hazaron koi ahl-e-dil nahin

ab rasm-e-ashiqi se bhi husn-e-amal gaya

daim shab-e-firaq mein shoale se ishq ke

misl-e-charagh dagh-e-dil-e-KHasta jal gaya

kya us ke ji mein aai ki muddat ke baad yar

khulne laga tha hum se wa-lekin sambhal gaya

aashuftagi se mere dil-e-na-tawan ka haal

bigDa KHudaya aisa mera dam nikal gaya

fariyaad-e-shoala-bar ne kya kya ghazab kiye

jawen kahan 'jalali' chaman sara jal gaya