ab ahl-e-dard ye jine ka ehtimam karen

ab ahl-e-dard ye jiine kā ehtimām kareñ

use bhulā ke ġham-e-zindagī kā naam kareñ

fareb khā ke un āñkhoñ kā kab talak ai dil

sharāb-e-ḳhām piyeñ raqs-e-nā-tamām kareñ

ġham-e-hayāt ne āvāra kar diyā varna

thī aarzū ki tire dar pe sub.h o shaam kareñ

na māñgūñ bāda-e-gul-gūñ se bhiik mastī kī

agar tire lab-e-lālīñ mirā ye kaam kareñ

na dekheñ dair o haram sū-e-rah-ravān-e-hayāt

ye qāfile to na jaane kahāñ qayām kareñ

haiñ is kashākash-e-paiham meñ zindagī ke maze

phir ek baar koī sa.i-e-nā-tamām kareñ

sikhā.eñ dast-e-talab ko adā-e-bebākī

payām-e-zer-labī ko salā-e-ām kareñ

ġhulām rah chuke toḌeñ ye band-e-rusvā.ī

kuchh apne bāzu-e-mehnat kā ehtirām kareñ

zamīñ ko mil ke sañvāreñ misāl-e-rū-e-nigār

ruḳh-e-nigār se raushan charāġh-e-bām kareñ

phir uTh ke garm kareñ kārobār-e-zulf-o-junūñ

phir apne saath use bhī asīr-e-dām kareñ

mirī nigāh meñ hai arz-e-moscow 'majrūh'

vo sarzamīñ ki sitāre jise salām kareñ

ab ahl-e-dard ye jine ka ehtimam karen

use bhula ke gham-e-zindagi ka nam karen

fareb kha ke un aankhon ka kab talak ai dil

sharab-e-KHam piyen raqs-e-na-tamam karen

gham-e-hayat ne aawara kar diya warna

thi aarzu ki tere dar pe subh o sham karen

na mangun baada-e-gul-gun se bhik masti ki

agar tere lab-e-lalin mera ye kaam karen

na dekhen dair o haram su-e-rah-rawan-e-hayat

ye qafile to na jaane kahan qayam karen

hain is kashakash-e-paiham mein zindagi ke maze

phir ek bar koi sai-e-na-tamam karen

sikhaen dast-e-talab ko ada-e-bebaki

payam-e-zer-labi ko sala-e-am karen

ghulam rah chuke toDen ye band-e-ruswai

kuchh apne bazu-e-mehnat ka ehtiram karen

zamin ko mil ke sanwaren misal-e-ru-e-nigar

ruKH-e-nigar se raushan charagh-e-baam karen

phir uTh ke garm karen karobar-e-zulf-o-junun

phir apne sath use bhi asir-e-dam karen

meri nigah mein hai arz-e-moscow 'majruh'

wo sarzamin ki sitare jise salam karen