ab chaman mein ham-nafas aur ham-zaban koi nahin

ab chaman meñ ham-nafas aur ham-zabāñ koī nahīñ

ham-nashīñ koī nahīñ hai rāzdāñ koī nahīñ

kis se hāl-e-dil kaheñ kis ko sunā.eñ hāl-e-zār

chāra-sāz-e-dard-e-dil-soz-e-nihāñ koī nahīñ

kal bhī maiñ tanhā rahā huuñ aur tanhā aaj bhī

kal vahāñ koī na thā aur ab yahāñ koī nahīñ

fasl-e-gul aate hī uThtī hai sadā-e-zāġh o buum

ġhuncha-o-gul aur bulbul shādmāñ koī nahīñ

nukta-chīñ mahfil kī raunaq ban ga.e haiñ āj-kal

bazm-e-yārāñ meñ sitam hai nukta-dāñ koī nahīñ

yuuñ to kahne ko sabhī the ham-safīr-o-ham-ḳhayāl

ham-safar koī nahīñ ab ham-ināñ koī nahīñ

ab chaman mein ham-nafas aur ham-zaban koi nahin

ham-nashin koi nahin hai raazdan koi nahin

kis se haal-e-dil kahen kis ko sunaen haal-e-zar

chaara-saz-e-dard-e-dil-soz-e-nihan koi nahin

kal bhi main tanha raha hun aur tanha aaj bhi

kal wahan koi na tha aur ab yahan koi nahin

fasl-e-gul aate hi uThti hai sada-e-zagh o bum

ghuncha-o-gul aur bulbul shadman koi nahin

nukta-chin mahfil ki raunaq ban gae hain aaj-kal

bazm-e-yaran mein sitam hai nukta-dan koi nahin

yun to kahne ko sabhi the ham-safir-o-ham-KHayal

ham-safar koi nahin ab ham-inan koi nahin