ab dil mein aarzuon ke aasar dekhna

ab dil meñ ārzūoñ ke āsār dekhnā

vīrāniyoñ meñ shahar-e-numūdār dekhnā

kaun aa gayā charāġh kī lau kis ne tez kī

sho.ale se ho gayā hai kise pyaar dekhnā

do ashk chashm-e-nāz kī duniyā badal ga.e

ik barg-e-gul pe os kī miqdār dekhnā

mansūr ik giraft meñ mansūr ho gayā

banda-navāzī-e-rasan-o-dār dekhnā

ye kaun jhāñktā hai darīche se bār-bār

lau de rahā hai sāya-e-dīvār dekhnā

dāman se duur rah gayā haath āftāb kā

us aane vaalī sub.h kī raftār dekhnā

aa.ī jo gard-e-rāh to dāman jhaTak diyā

āvārgān-e-shauq kā kirdār dekhnā

tum ko agar na ho koī ehsās-e-kamtarī

'nāzish' kī chashm-e-shauq kā me.aar dekhnā

ab dil mein aarzuon ke aasar dekhna

viraniyon mein shahar-e-numudar dekhna

kaun aa gaya charagh ki lau kis ne tez ki

shoale se ho gaya hai kise pyar dekhna

do ashk chashm-e-naz ki duniya badal gae

ek barg-e-gul pe os ki miqdar dekhna

mansur ek giraft mein mansur ho gaya

banda-nawazi-e-rasan-o-dar dekhna

ye kaun jhankta hai dariche se bar-bar

lau de raha hai saya-e-diwar dekhna

daman se dur rah gaya hath aaftab ka

us aane wali subh ki raftar dekhna

aai jo gard-e-rah to daman jhaTak diya

aawargan-e-shauq ka kirdar dekhna

tum ko agar na ho koi ehsas-e-kamtari

'nazish' ki chashm-e-shauq ka mear dekhna