ab har ek dard ko us dard ki lazzat jaano

ab har ik dard ko us dard kī lazzat jaano

aur āñkhoñ ko kisī ḳhvāb kī qīmat jaano

sab parindoñ ko isī yaad kā maz.har samjho

saarī ḳhushiyoñ ko usī ġham kī alāmat jaano

husn duniyā ko isī shakl kā partav samjho

zindagī us kī hī yādoñ kī amānat jaano

kaun miltā hai kise sirf mohabbat ke tufail

vo bichhaḌ jaa.e to us ko hī haqīqat jaano

har na.e phuul ko mausam kā karishma samjho

har na.e dasht ko bādal kī siyāsat jaano

DhūñDte jaao akele sar-e-sahrā-e-hayāt

dasht-e-tanhā ko magar us kī rifāqat jaano

apne sab hijr to sachche nahīñ hote haiñ magar

ālam-e-hijr meñ yādoñ ko ibādat jaano

ik nafas bhī to nahīñ ishq kā rasta 'ādil'

ek lamhe kī mohabbat ko ġhanīmat jaano

ab har ek dard ko us dard ki lazzat jaano

aur aankhon ko kisi KHwab ki qimat jaano

sab parindon ko isi yaad ka mazhar samjho

sari KHushiyon ko usi gham ki alamat jaano

husn duniya ko isi shakl ka partaw samjho

zindagi us ki hi yaadon ki amanat jaano

kaun milta hai kise sirf mohabbat ke tufail

wo bichhaD jae to us ko hi haqiqat jaano

har nae phul ko mausam ka karishma samjho

har nae dasht ko baadal ki siyasat jaano

DhunDte jao akele sar-e-sahra-e-hayat

dasht-e-tanha ko magar us ki rifaqat jaano

apne sab hijr to sachche nahin hote hain magar

aalam-e-hijr mein yaadon ko ibaadat jaano

ek nafas bhi to nahin ishq ka rasta 'adil'

ek lamhe ki mohabbat ko ghanimat jaano