ab harf-e-tamanna ko samaat na milegi

ab harf-e-tamannā ko samā.at na milegī

bechoge agar ḳhvāb to qīmat na milegī

tash.hīr ke bāzār meñ ai taaza ḳharīdār

zebā.isheñ mil jā.eñgī qāmat na milegī

lamhoñ ke ta.āqub meñ guzar jā.eñgī sadiyāñ

yuuñ vaqt to mil jā.egā mohlat na milegī

sochā hī na thā yuuñ bhī use yaad rakheñge

jab us ko bhulāne kī bhī fursat na milegī

tā-umr vahī kār-e-ziyāñ ishq rahā yaad

hālāñki ye ma.alūm thā ujrat na milegī

ta.abīr nazar aane lagī ḳhvāb kī sūrat

ab ḳhvāb hī dekhoge bashārat na milegī

ā.īna-sifat vaqt tirā husn haiñ ham log

kal aa.ine tarseñge to sūrat na milegī

ab harf-e-tamanna ko samaat na milegi

bechoge agar KHwab to qimat na milegi

tashhir ke bazar mein ai taza KHaridar

zebaishen mil jaengi qamat na milegi

lamhon ke taaqub mein guzar jaengi sadiyan

yun waqt to mil jaega mohlat na milegi

socha hi na tha yun bhi use yaad rakhenge

jab us ko bhulane ki bhi fursat na milegi

ta-umr wahi kar-e-ziyan ishq raha yaad

haalanki ye malum tha ujrat na milegi

tabir nazar aane lagi KHwab ki surat

ab KHwab hi dekhoge bashaarat na milegi

aaina-sifat waqt tera husn hain hum log

kal aaine tarsenge to surat na milegi