ab jo hum zist mein bezar nazar aate hain

ab jo ham ziist meñ bezār nazar aate haiñ

har taraf apne ḳharīdār nazar aate haiñ

vo hameñ maḳhzan-e-asrār nazar aate haiñ

ham unheñ āshiq-e-bezār nazar aate haiñ

ham ko mai-ḳhvār hī mai-ḳhvār nazar aate haiñ

sab mai-e-ishq se sarshār nazar aate haiñ

bad-zanī zulm-o-sitam hajv-e-sanam rusvā.ī

ishq meñ to baḌe āzār nazar aate haiñ

sab kā dil lete haiñ aur apnā nahīñ dete haiñ

aap ham ko baḌe hoshyār nazar aate haiñ

ḳhatm mujh par hī nahīñ ishq masīhā mere

mujh ko to aap bhī bīmār nazar aate haiñ

ab jo rusvā.ī pe merī unheñ dard aayā hai

bāryābī ke kuchh āsār nazar aate haiñ

dasht-paimā.ī se jab ābla-pā sotā huuñ

ḳhvāb meñ aap guhar-bār nazar aate haiñ

ek vo haiñ ki zamāne meñ hai shohra jin kā

ek ham mulk pe jo baar nazar aate haiñ

kūḌe-karkaT kā milegā na vilāyat meñ nishāñ

hind meñ har taraf ambār nazar aate haiñ

kis se shikva karūñ 'rahbar' ki sabhī ab to mujhe

mere dilbar ke talabgār nazar aate haiñ

ab jo hum zist mein bezar nazar aate hain

har taraf apne KHaridar nazar aate hain

wo hamein maKHzan-e-asrar nazar aate hain

hum unhen aashiq-e-bezar nazar aate hain

hum ko mai-KHwar hi mai-KHwar nazar aate hain

sab mai-e-ishq se sarshaar nazar aate hain

bad-zani zulm-o-sitam hajw-e-sanam ruswai

ishq mein to baDe aazar nazar aate hain

sab ka dil lete hain aur apna nahin dete hain

aap hum ko baDe hoshyar nazar aate hain

KHatm mujh par hi nahin ishq masiha mere

mujh ko to aap bhi bimar nazar aate hain

ab jo ruswai pe meri unhen dard aaya hai

baryabi ke kuchh aasar nazar aate hain

dasht-paimai se jab aabla-pa sota hun

KHwab mein aap guhar-bar nazar aate hain

ek wo hain ki zamane mein hai shohra jin ka

ek hum mulk pe jo bar nazar aate hain

kuDe-karkaT ka milega na wilayat mein nishan

hind mein har taraf ambar nazar aate hain

kis se shikwa karun 'rahbar' ki sabhi ab to mujhe

mere dilbar ke talabgar nazar aate hain