ab jo mujhse unhen hijab nahin

ab jo mujh se unheñ hijāb nahīñ

dil ko pahlā sā iztirāb nahīñ

hai unheñ mujh pe e'timād-e-vafā

ab unheñ mujh se ijtināb nahīñ

baḳhsh kar lutf-e-vasl kahte haiñ

ab na kahnā ki kāmyāb nahīñ

is qadar haiñ vo mehrbāñ mujh par

un ke altāf kā hisāb nahīñ

kāmyāb-e-visāl-e-jānāñ huuñ

phir bhī kahte haiñ kāmyāb nahīñ

maiñ to sairāb-e-aish-e-vasl karūñ

kyā karūñ tujh ko is kī taab nahīñ

maiñ ye kyūñkar kahūñ ki hasb-e-murād

dil-e-pur-shauq kāmyāb nahīñ

aap se chhuT ke rah nahīñ saktā

ba-ḳhudā is kī dil ko taab nahīñ

ab bhī huuñ be-qarār-e-lutf-o-karam

go vo aglā sā iztirāb nahīñ

aap ke rahm kī zarūrat ho

hāl-e-dil is qadar ḳharāb nahīñ

vo nazar laakh be-hijāb sahī

dast-e-gustāḳh kā javāb nahīñ

aaj duniyā-e-dil-barī meñ kahīñ

aap ke husn kā javāb nahīñ

aaj lākhoñ meñ intiḳhāb haiñ aap

duur duur aap kā javāb nahīñ

ruḳh-e-jānāñ meñ ab bhī hai ik baat

go vo pahlī sī āb-o-tāb nahīñ

aap kī chashm-e-mast ke aage

asar-e-mastī-e-sharāb nahīñ

aap ke husn ke muqābil meñ

koī shai surḳhī-e-gulāb nahīñ

sach to ye hai jamāl-e-jānāñ kā

ek partav hai āftāb nahīñ

aaj tere sivā 'jalīl' koī

rang-e-hasrat meñ kāmyāb nahīñ

ab jo mujh se unhen hijab nahin

dil ko pahla sa iztirab nahin

hai unhen mujh pe e'timad-e-wafa

ab unhen mujh se ijtinab nahin

baKHsh kar lutf-e-wasl kahte hain

ab na kahna ki kaamyab nahin

is qadar hain wo mehrban mujh par

un ke altaf ka hisab nahin

kaamyab-e-visal-e-jaanan hun

phir bhi kahte hain kaamyab nahin

main to sairab-e-aish-e-wasl karun

kya karun tujh ko is ki tab nahin

main ye kyunkar kahun ki hasb-e-murad

dil-e-pur-shauq kaamyab nahin

aap se chhuT ke rah nahin sakta

ba-KHuda is ki dil ko tab nahin

ab bhi hun be-qarar-e-lutf-o-karam

go wo agla sa iztirab nahin

aap ke rahm ki zarurat ho

haal-e-dil is qadar KHarab nahin

wo nazar lakh be-hijab sahi

dast-e-gustaKH ka jawab nahin

aaj duniya-e-dil-bari mein kahin

aap ke husn ka jawab nahin

aaj lakhon mein intiKHab hain aap

dur dur aap ka jawab nahin

ruKH-e-jaanan mein ab bhi hai ek baat

go wo pahli si aab-o-tab nahin

aap ki chashm-e-mast ke aage

asar-e-masti-e-sharab nahin

aap ke husn ke muqabil mein

koi shai surKHi-e-gulab nahin

sach to ye hai jamal-e-jaanan ka

ek partaw hai aaftab nahin

aaj tere siwa 'jalil' koi

rang-e-hasrat mein kaamyab nahin