ab jo tum se nahin mil pae to mushkil hogi

ab jo tum se nahīñ mil paa.e to mushkil hogī

fasl-e-gul yūñhī guzar jaa.e to mushkil hogī

jis ko mar mar ke bhulāyā thā baḌī mushkil se

phir kahīñ yaad vo aa jaa.e to mushkil hogī

phir vo purvā.ī chalī ai mire dil ḳhair nahīñ

phir koī choT ubhar aa.e to mushkil hogī

maiñ nahīñ dekhtī is Dar se kisī kī jānib

aañkh se dil meñ samā jaa.e to mushkil hogī

zulmat-e-yās koī kam nahīñ aur us pe agar

shaam ke gahre hue saa.e to mushkil hogī

nikle jaate haiñ mire dil ke sab armān 'nazar'

ghar jo vīrān ye ho jaa.e to mushkil hogī

ab jo tum se nahin mil pae to mushkil hogi

fasl-e-gul yunhi guzar jae to mushkil hogi

jis ko mar mar ke bhulaya tha baDi mushkil se

phir kahin yaad wo aa jae to mushkil hogi

phir wo purwai chali ai mere dil KHair nahin

phir koi choT ubhar aae to mushkil hogi

main nahin dekhti is Dar se kisi ki jaanib

aankh se dil mein sama jae to mushkil hogi

zulmat-e-yas koi kam nahin aur us pe agar

sham ke gahre hue sae to mushkil hogi

nikle jate hain mere dil ke sab arman 'nazar'

ghar jo viran ye ho jae to mushkil hogi