ab ke baras gulshan mein na jaane kaisi hawa lahrai hai

ab ke baras gulshan meñ na jaane kaisī havā lahrā.ī hai

mausam mausam gard-ālūda saarī fazā dhuñdlā.ī hai

mustaqbil ke ḳhvāb sajā.e apnī apnī āñkhoñ meñ

saare paḌosī jaag rahe haiñ aur hameñ niiñd aa.ī hai

kaun kise ab sar kartā hai vaqt hī ye batlā.egā

ek taraf hai azm-e-musammam ek taraf dārā.ī hai

sat.h-e-zamīñ kā har ik ḳhitta Duub rahā hai paanī meñ

aise meñ kyā andāza ho kitnī kahāñ gahrā.ī hai

ham ko mashīnoñ kī shorish se hotī hai ghabrāhaT sī

ḳhāmoshī kī chāhat ham ko gaaoñ meñ phir le aa.ī hai

is baare meñ kuchh batlā kar aap vazāhat rahne deñ

kis ne dil ko zaḳhm diye haiñ kis kī karam-farmā.ī hai

koī burā kyā maane 'shahzar' saudā.ī kī bātoñ kā

dānish-var phir dānish-var hai saudā.ī saudā.ī hai

ab ke baras gulshan mein na jaane kaisi hawa lahrai hai

mausam mausam gard-aluda sari faza dhundlai hai

mustaqbil ke KHwab sajae apni apni aankhon mein

sare paDosi jag rahe hain aur hamein nind aai hai

kaun kise ab sar karta hai waqt hi ye batlaega

ek taraf hai azm-e-musammam ek taraf darai hai

sath-e-zamin ka har ek KHitta Dub raha hai pani mein

aise mein kya andaza ho kitni kahan gahrai hai

hum ko mashinon ki shorish se hoti hai ghabrahaT si

KHamoshi ki chahat hum ko gaon mein phir le aai hai

is bare mein kuchh batla kar aap wazahat rahne den

kis ne dil ko zaKHm diye hain kis ki karam-farmai hai

koi bura kya mane 'shahzar' saudai ki baaton ka

danish-war phir danish-war hai saudai saudai hai