ab ke jo yahan se jaenge hum

ab ke jo yahāñ se jā.eñge ham

phir tujh ko na muñh dikhā.eñge ham

mushkil hai na aanā tujh galī meñ

par ye bhī sahī na ā.eñge ham

jo aage kahā kiye haiñ tujh se

so ab ke vo kar dikhā.eñge ham

aisā hī jo dil na rah sakegā

Tuk duur se dekh jā.eñge ham

haañ kyuuñ na mileñge tujh se zālim

jab gāliyeñ nit kī khā.eñge ham

āzurda ho ġhair se laḌo yaañ

is ohde se kab bar ā.eñge ham

jiine hī se haath uThā.eñge lek

bāteñ na tirī uThā.eñge ham

gar ziist hai tujh talak to phir kyā

sadqe tire mar hī jā.eñge ham

ab kūche meñ tere hī pyāre

kisī aur se jī lagā.eñge ham

juuñ chāhiye chaah kā sarishta

jiite haiñ to kar dikhā.eñge ham

is par bhī agar mileñge ḳhair

'qā.em' hī na phir kahā.eñge ham

ab ke jo yahan se jaenge hum

phir tujh ko na munh dikhaenge hum

mushkil hai na aana tujh gali mein

par ye bhi sahi na aaenge hum

jo aage kaha kiye hain tujh se

so ab ke wo kar dikhaenge hum

aisa hi jo dil na rah sakega

Tuk dur se dekh jaenge hum

han kyun na milenge tujh se zalim

jab galiyen nit ki khaenge hum

aazurda ho ghair se laDo yan

is ohde se kab bar aaenge hum

jine hi se hath uThaenge lek

baaten na teri uThaenge hum

gar zist hai tujh talak to phir kya

sadqe tere mar hi jaenge hum

ab kuche mein tere hi pyare

kisi aur se ji lagaenge hum

jun chahiye chah ka sarishta

jite hain to kar dikhaenge hum

is par bhi agar milenge KHair

'qaem' hi na phir kahaenge hum