ab koi rah bhi aasan nahin dekhne mein

ab koī raah bhī āsān nahīñ dekhne meñ

dekhte rahte haiñ aur dhyān nahīñ dekhne meñ

kitnī vīrān nazar aatī hai tā-hadd-e-nazar

yahī duniyā ki jo vīrān nahīñ dekhne meñ

ḳhālī tanhā.ī ḳhazānoñ se bharī rahtī hai

aur yahāñ koī bhī sāmān nahīñ dekhne meñ

in dinoñ fursat-e-tābīr kahāñ mumkin hai

in dinoñ ḳhvāb bhī āsān nahīñ dekhne meñ

vaise to hijr meñ us ko bhī nahīñ koī malāl

vaise to maiñ bhī pareshān nahīñ dekhne meñ

saare kamroñ meñ koī ret uḌātī hai mujhe

ye mirā ghar ki bayābān nahīñ dekhne meñ

ik nazar sū-e-malāmat bhī agar dekhā kareñ

maiñ samajhtā huuñ ki nuqsān nahīñ dekhne meñ

us jagah bhī koī imkān nikal aatā hai

jis jagah koī bhī imkān nahīñ dekhne meñ

itnā hairān rahā huuñ to banā huuñ aisā

maiñ vo ik shaḳhs ki hairān nahīñ dekhne meñ

ab koi rah bhi aasan nahin dekhne mein

dekhte rahte hain aur dhyan nahin dekhne mein

kitni viran nazar aati hai ta-hadd-e-nazar

yahi duniya ki jo viran nahin dekhne mein

KHali tanhai KHazanon se bhari rahti hai

aur yahan koi bhi saman nahin dekhne mein

in dinon fursat-e-tabir kahan mumkin hai

in dinon KHwab bhi aasan nahin dekhne mein

waise to hijr mein us ko bhi nahin koi malal

waise to main bhi pareshan nahin dekhne mein

sare kamron mein koi ret uDati hai mujhe

ye mera ghar ki bayaban nahin dekhne mein

ek nazar su-e-malamat bhi agar dekha karen

main samajhta hun ki nuqsan nahin dekhne mein

us jagah bhi koi imkan nikal aata hai

jis jagah koi bhi imkan nahin dekhne mein

itna hairan raha hun to bana hun aisa

main wo ek shaKHs ki hairan nahin dekhne mein