ab koi tera misl nahin naz-o-ada mein

ab koī tirā misl nahīñ nāz-o-adā meñ

andāz meñ shoḳhī meñ sharārat meñ hayā meñ

maġhrūr se sarkash mutavāze pe huuñ qurbāñ

miTTī meñ to miTTī huuñ havā huuñ maiñ havā meñ

kyā ḳhuub vo ḳhud karte haiñ yuuñ apnī satā.ish

aafat huuñ jalāne meñ qayāmat huuñ jafā meñ

ġhairat nahīñ aatī tumheñ har baat meñ baiThe

ulfat meñ mohabbat meñ muravvat meñ vafā meñ

jab ho dam-e-āḳhir to bachā lene kī tāqat

phir ḳhāk-e-shifā meñ na kahīñ āb-e-baqā meñ

vo chāhe to sab kuchh hai na chāhe to nahīñ kuchh

ta.avīz meñ ganDe meñ fatīle meñ duā meñ

ik adnā sā parda hai ik adnā sā tafāvut

maḳhlūq meñ ma.abūd meñ bande meñ ḳhudā meñ

surḳhī ke sabab ḳhuub khilā hai gul-e-lāla

aariz meñ laboñ meñ kaf-e-dast o kaf-e-pā meñ

ushshāq kī ḳhūñ-rezī se kyā fā.eda zālim

mashġhūl ho lākhe meñ to masrūf hinā meñ

āshiq to hamesha hai mohabbat kī badaulat

ilzām meñ taqsīr meñ isyāñ meñ ḳhatā meñ

ham bhī the kabhī ḳhūbi-e-taqdīr se 'parvīñ'

arfāt meñ muzdalfa meñ makka meñ minā meñ

ab koi tera misl nahin naz-o-ada mein

andaz mein shoKHi mein shararat mein haya mein

maghrur se sarkash mutawaze pe hun qurban

miTTi mein to miTTi hun hawa hun main hawa mein

kya KHub wo KHud karte hain yun apni sataish

aafat hun jalane mein qayamat hun jafa mein

ghairat nahin aati tumhein har baat mein baiThe

ulfat mein mohabbat mein murawwat mein wafa mein

jab ho dam-e-aKHir to bacha lene ki taqat

phir KHak-e-shifa mein na kahin aab-e-baqa mein

wo chahe to sab kuchh hai na chahe to nahin kuchh

tawiz mein ganDe mein fatile mein dua mein

ek adna sa parda hai ek adna sa tafawut

maKHluq mein mabud mein bande mein KHuda mein

surKHi ke sabab KHub khila hai gul-e-lala

aariz mein labon mein kaf-e-dast o kaf-e-pa mein

ushshaq ki KHun-rezi se kya faeda zalim

mashghul ho lakhe mein to masruf hina mein

aashiq to hamesha hai mohabbat ki badaulat

ilzam mein taqsir mein isyan mein KHata mein

hum bhi the kabhi KHubi-e-taqdir se 'parwin'

arfat mein muzdalfa mein makka mein mina mein