ab kya ye hisab kitab rakkhen kis kis ne hamein barbaad kiya

ab kyā ye hisāb kitāb rakkheñ kis kis ne hameñ barbād kiyā

kis kis ne ḳhushiyāñ diiñ ham ko kis kis ne hameñ nāshād kiyā

ik aas thī so vo TuuT ga.ī ik saañs thī vo bhī chhūT ga.ī

ab ye kaahe kī hichkī hai ab kaun hai jis ne yaad kiyā

vo ishq thā yā majbūrī thī ab tak ye muamma hal na huā

har roz muāfī ke badle ik taaza sitam ījād kiyā

āsān nahīñ thā us ke binā par guzar ga.ī jo guzarnī thī

vo dil jo kabhī ujāḌā hī nahīñ tire ġham ne jise ābād kiyā

ye pyār-vyār kī bāteñ sab duniyā jise sher samajhtī hai

sab us kī jafā ke qisse haiñ jis ne hameñ lā.eq-e-dād kiyā

jab tum hī nahīñ hāsil ham ko kyā hāsil duniyā milne se

bejā ye ḳhvāhish-e-ishq rahī bejā ḳhud ko farhād kiyā

barbād to honā thā āḳhir ik din to kisī ke hāthoñ se

par naaz karo 'abdul-qādir' ki us ne tumheñ barbād kiyā

ab kya ye hisab kitab rakkhen kis kis ne hamein barbaad kiya

kis kis ne KHushiyan din hum ko kis kis ne hamein nashad kiya

ek aas thi so wo TuT gai ek sans thi wo bhi chhuT gai

ab ye kahe ki hichki hai ab kaun hai jis ne yaad kiya

wo ishq tha ya majburi thi ab tak ye muamma hal na hua

har roz muafi ke badle ek taza sitam ijad kiya

aasan nahin tha us ke bina par guzar gai jo guzarni thi

wo dil jo kabhi ujaDa hi nahin tere gham ne jise aabaad kiya

ye pyar-wyar ki baaten sab duniya jise sher samajhti hai

sab us ki jafa ke qisse hain jis ne hamein laeq-e-dad kiya

jab tum hi nahin hasil hum ko kya hasil duniya milne se

beja ye KHwahish-e-ishq rahi beja KHud ko farhad kiya

barbaad to hona tha aaKHir ek din to kisi ke hathon se

par naz karo 'abdul-qadir' ki us ne tumhein barbaad kiya