اب میں راشن کی قطاروں میں نظر آتا ہوں

اب میں راشن کی قطاروں میں نظر آتا ہوں

اپنے کھیتوں سے بچھڑنے کی سزا پاتا ہوں

اتنی مہنگائی کہ بازار سے کچھ لاتا ہوں

اپنے بچوں میں اسے بانٹ کے شرماتا ہوں

مجھ کو ڈر ہے کہ ترا بھید نہ کھل جائے کہیں

میری عادت ہے کہ میں نیند میں چلاتا ہوں

زخمی نیندوں کا لہو پونچھنے کی کوشش میں

جاگتے جاگتے تھک جاتا ہوں سو جاتا ہوں

ظلم بھی مجھ پہ ہوا مجھ پہ یہ تہمت بھی لگی

میں ہی دنیا میں فسادوں کا جنم داتا ہوں

کھینچ لے جائے نہ چادر ہی سمجھ کر کوئی

میں خلیلؔ آج کفن اوڑھ کے سو جاتا ہوں