ab sochta hun umr-e-do-roza se kya mila

ab sochtā huuñ umr-e-do-roza se kyā milā

duniyā ko kyā diyā mujhe duniyā se kyā milā

jo kam-nigāh the vahī ahl-e-nazar bane

ham ko hamāre dīda-e-bīnā se kyā milā

dil ko diye haiñ zauq-e-tamannā ne sau fareb

dil ko magar fareb-e-tamannā se kyā milā

irfān-e-shauq josh-e-junūñ zauq-e-bandagī

un kī talab thī aur mujhe kyā se kyā milā

dil hai ki rañg-o-bū ke talātum meñ ġharq hai

maiñ kyā kahūñ ki us gul-e-ra.anā se kyā milā

vo mutma.in haiñ ahd-e-rifāqat ko toḌ kar

ham munfa.il ki va.ada-e-fardā se kyā milā

dāman meñ aaj ḳhaar haiñ chhāle haiñ paañv meñ

gulshan se kyā milā mujhe sahrā se kyā milā

mere surūr-e-shauq ne be-ḳhud kiyā mujhe

varna ḳhumār bāda-e-sahbā se kyā milā

tāb-e-nazar nahīñ sahī zauq-e-nazar to hai

dil ko ḳhabar se sa.ī-e-tamāshā se kyā milā

kyā shām-e-ārzū se 'mubārak' kareñ 'umīd'

ham ko hamārī sub.h-e-tamannā se kyā milā

ab sochta hun umr-e-do-roza se kya mila

duniya ko kya diya mujhe duniya se kya mila

jo kam-nigah the wahi ahl-e-nazar bane

hum ko hamare dida-e-bina se kya mila

dil ko diye hain zauq-e-tamanna ne sau fareb

dil ko magar fareb-e-tamanna se kya mila

irfan-e-shauq josh-e-junun zauq-e-bandagi

un ki talab thi aur mujhe kya se kya mila

dil hai ki rang-o-bu ke talatum mein gharq hai

main kya kahun ki us gul-e-rana se kya mila

wo mutmain hain ahd-e-rifaqat ko toD kar

hum munfail ki wada-e-farda se kya mila

daman mein aaj KHar hain chhaale hain panw mein

gulshan se kya mila mujhe sahra se kya mila

mere surur-e-shauq ne be-KHud kiya mujhe

warna KHumar baada-e-sahba se kya mila

tab-e-nazar nahin sahi zauq-e-nazar to hai

dil ko KHabar se sai-e-tamasha se kya mila

kya sham-e-arzu se 'mubarak' karen 'umid'

hum ko hamari subh-e-tamanna se kya mila