ab tak jo ji chuka hun janam gin raha hun main

ab tak jo jī chukā huuñ janam gin rahā huuñ maiñ

duniyā samajh rahī hai ki ġham gin rahā huuñ maiñ

matrūk rāste meñ lagā sang-e-mīl huuñ

bhaTke hue ke sīdhe qadam gin rahā huuñ maiñ

Table se gir ke raat ko TuuTā hai ik gilās

battī jalā ke apnī raqam gin rahā huuñ maiñ

tā'dād jānñā hai ki kitne mare haiñ aaj

jo chal nahīñ sake haiñ vo bam gin rahā huuñ maiñ

us kī taraf gayā huuñ ghaḌī dekhtā huā

ab vāpsī pe apne qadam gin rahā huuñ maiñ

uñglī pe gin rahā huuñ sabhī dostoñ ke naam

lekin tumhāre naam pe ham gin rahā huuñ maiñ

maiñ santarī huuñ 'auratoñ kī jail kā huzūr

do-chār qaidī is liye kam gin rahā huuñ maiñ

'ārish' surāhī-dār sī gardan ke sehr meñ

zamzam sī guftugū ko bhī ram gin rahā huuñ maiñ

ab tak jo ji chuka hun janam gin raha hun main

duniya samajh rahi hai ki gham gin raha hun main

matruk raste mein laga sang-e-mil hun

bhaTke hue ke sidhe qadam gin raha hun main

Table se gir ke raat ko TuTa hai ek gilas

batti jala ke apni raqam gin raha hun main

ta'dad jaanna hai ki kitne mare hain aaj

jo chal nahin sake hain wo bam gin raha hun main

us ki taraf gaya hun ghaDi dekhta hua

ab wapsi pe apne qadam gin raha hun main

ungli pe gin raha hun sabhi doston ke nam

lekin tumhaare nam pe hum gin raha hun main

main santari hun 'auraton ki jail ka huzur

do-chaar qaidi is liye kam gin raha hun main

'arish' surahi-dar si gardan ke sehr mein

zamzam si guftugu ko bhi ram gin raha hun main