ab tak mujhe na koi mera raaz-dan mila

ab tak mujhe na koī mirā rāz-dāñ milā

jo bhī milā asīr-e-zamān-o-makāñ milā

kyā jaane kyā samajh ke hamesha kiyā gurez

sau baar bijliyoñ ko mirā āshiyāñ milā

uktā gayā huuñ jāda-e-nau kī talāsh se

har raah meñ koī na koī kārvāñ milā

muddat meñ ham ne aap banāyā thā ik ufuq

jaate the us taraf ki tirā āstāñ milā

kin hausloñ ke kitne diye bujh ke rah ga.e

ai soz-e-āshiqī tū bahut hī garāñ milā

kyā kuchh luTā diyā hai tirī har adā ke saath

kyā mil gayā hameñ jo ye husn-e-bayāñ milā

thā ek rāz-dār-e-mohabbat se lutf-e-zīst

lekin vo rāz-dār-e-mohabbat kahāñ milā

ik umr ba.ad isī mutalavvin nigāh meñ

kitnī mohabbatoñ kā ḳhazāna nihāñ milā

ab justujū kā ruḳh jo muḌā hai to mat pukār

sab tujh ko DhūñDte the magar tū kahāñ milā

ab tak mujhe na koi mera raaz-dan mila

jo bhi mila asir-e-zaman-o-makan mila

kya jaane kya samajh ke hamesha kiya gurez

sau bar bijliyon ko mera aashiyan mila

ukta gaya hun jada-e-nau ki talash se

har rah mein koi na koi karwan mila

muddat mein hum ne aap banaya tha ek ufuq

jate the us taraf ki tera aastan mila

kin hauslon ke kitne diye bujh ke rah gae

ai soz-e-ashiqi tu bahut hi garan mila

kya kuchh luTa diya hai teri har ada ke sath

kya mil gaya hamein jo ye husn-e-bayan mila

tha ek raaz-dar-e-mohabbat se lutf-e-zist

lekin wo raaz-dar-e-mohabbat kahan mila

ek umr baad isi mutalawwin nigah mein

kitni mohabbaton ka KHazana nihan mila

ab justuju ka ruKH jo muDa hai to mat pukar

sab tujh ko DhunDte the magar tu kahan mila