ab tere hijr mein yun umr basar hoti hai

ab tire hijr meñ yuuñ umr basar hotī hai

shaam hotī hai to ro ro ke sahar hotī hai

kyuuñ sar-e-shām umīdoñ ke diye bujhne lage

kitnī vīrān tirī rāhguzar hotī hai

be-ḳhayālī meñ bhī phir un kā ḳhayāl aatā hai

vahī tasvīr mire pesh-e-nazar hotī hai

ye avadh hai ki jahāñ shaam kabhī ḳhatm nahīñ

vo banaras hai jahāñ roz sahar hotī hai

apne barbād nasheman ko bhulā detā huuñ

jab sulagte hue gulshan pe nazar hotī hai

barq girtī hai to ḳhirman ko jalā jaatī hai

kab use mehnat-e-dahqāñ kī ḳhabar hotī hai

haa.e phūloñ ke muqaddar pe bhī dil rotā hai

zindagī un kī bhī kāñToñ meñ basar hotī hai

āriz-e-ġhuncha-o-gul aur dahak uThte haiñ

ashk-e-shabnam meñ bhī tāsīr-e-sharar hotī hai

maiñ vo mahrūm-e-mohabbat huuñ ki 'anvār' mirī

jo duā hai vahī mahrūm-e-asar hotī hai

ab tere hijr mein yun umr basar hoti hai

sham hoti hai to ro ro ke sahar hoti hai

kyun sar-e-sham umidon ke diye bujhne lage

kitni viran teri rahguzar hoti hai

be-KHayali mein bhi phir un ka KHayal aata hai

wahi taswir mere pesh-e-nazar hoti hai

ye awadh hai ki jahan sham kabhi KHatm nahin

wo banaras hai jahan roz sahar hoti hai

apne barbaad nasheman ko bhula deta hun

jab sulagte hue gulshan pe nazar hoti hai

barq girti hai to KHirman ko jala jati hai

kab use mehnat-e-dahqan ki KHabar hoti hai

hae phulon ke muqaddar pe bhi dil rota hai

zindagi un ki bhi kanTon mein basar hoti hai

aariz-e-ghuncha-o-gul aur dahak uThte hain

ashk-e-shabnam mein bhi tasir-e-sharar hoti hai

main wo mahrum-e-mohabbat hun ki 'anwar' meri

jo dua hai wahi mahrum-e-asar hoti hai