ab tere shahr se chup-chap guzarna hoga

ab tire shahr se chup-chāp guzarnā hogā

zinda hote hue har moḌ pe marnā hogā

mere hālāt agar koī samajhnā chāhe

us ko ik baar mire dil meñ utarnā hogā

naqsh maazī ke miTā kar sabhī dil se apne

dard-o-ġham se hameñ ik baar ubharnā hogā

ham ne sachchā.ī kī har baar himāyat kī hai

ham ko is bhuul kā ḳhamyāza to bharnā hogā

aa.ina jaan ke dekhūñgī tirī āñkhoñ ko

jab kabhī tere liye mujh ko sañvarnā hogā

is mohabbat ko na lag jaa.e kahīñ koī nazar

ham ko duniyā kī nigāhoñ se bhī Darnā hogā

dekhnā hai hameñ ik va.ada-farāmosh 'siyā'

shaam tak dhuup ke sahrā meñ Thaharnā hogā

ab tere shahr se chup-chap guzarna hoga

zinda hote hue har moD pe marna hoga

mere haalat agar koi samajhna chahe

us ko ek bar mere dil mein utarna hoga

naqsh mazi ke miTa kar sabhi dil se apne

dard-o-gham se hamein ek bar ubharna hoga

hum ne sachchai ki har bar himayat ki hai

hum ko is bhul ka KHamyaza to bharna hoga

aaina jaan ke dekhungi teri aankhon ko

jab kabhi tere liye mujh ko sanwarna hoga

is mohabbat ko na lag jae kahin koi nazar

hum ko duniya ki nigahon se bhi Darna hoga

dekhna hai hamein ek wada-faramosh 'siya'

sham tak dhup ke sahra mein Thaharna hoga