ab to aa ja meri palken hain ye pyasi kab se

ab to aa jā mirī palkeñ haiñ ye pyāsī kab se

farsh-e-rah baiThī hai aa dekh udāsī kab se

mujh ko bhī achchhā nahīñ lagtā sañvarnā lekin

tark tū ne kiyā ye zauq-e-libāsī kab se

ghar meñ rishtoñ kī kaḌī TuuT ga.ī ho jaise

ghar meñ rahne lagī ik baat zarā sī kab se

bāñTtā phirtā hai dar dar tū mohabbat sab ko

ghar meñ baiThī hai idhar dekh piyāsī kab se

dil lubhātī rahī ik umr ye duniyā lekin

muntazir phuul rahe ghar meñ ye baasī kab se

yaad aatī hī nahīñ tujh ko mujhe hairat hai

muntazir hai kisī dahlīz pe maañ sī kab se

baal phailā.e hue phirtī hai nafrat haa.e

ho chukī 'fahmī' mohabbat kī ḳhalāsī kab se

ab to aa ja meri palken hain ye pyasi kab se

farsh-e-rah baiThi hai aa dekh udasi kab se

mujh ko bhi achchha nahin lagta sanwarna lekin

tark tu ne kiya ye zauq-e-libasi kab se

ghar mein rishton ki kaDi TuT gai ho jaise

ghar mein rahne lagi ek baat zara si kab se

banTta phirta hai dar dar tu mohabbat sab ko

ghar mein baiThi hai idhar dekh piyasi kab se

dil lubhati rahi ek umr ye duniya lekin

muntazir phul rahe ghar mein ye basi kab se

yaad aati hi nahin tujh ko mujhe hairat hai

muntazir hai kisi dahliz pe man si kab se

baal phailae hue phirti hai nafrat hae

ho chuki 'fahmi' mohabbat ki KHalasi kab se