ab to KHushi ka gham hai na gham ki KHushi mujhe

ab to ḳhushī kā ġham hai na ġham kī ḳhushī mujhe

be-his banā chukī hai bahut zindagī mujhe

vo vaqt bhī ḳhudā na dikhā.e kabhī mujhe

un kī nadāmatoñ pe ho sharmindagī mujhe

rone pe apne un ko bhī afsurda dekh kar

yuuñ ban rahā huuñ jaise ab aa.ī hañsī mujhe

yuuñ dījiye fareb-e-mohabbat ki umr bhar

maiñ zindagī ko yaad karūñ zindagī mujhe

rakhnā hai tishna-kām to saaqī bas ik nazar

sairāb kar na de mirī tishna-labī mujhe

paayā hai sab ne dil magar is dil ke bāvajūd

ik shai milī hai dil meñ khaTaktī huī mujhe

raazī hoñ yā ḳhafā hoñ vo jo kuchh bhī hoñ 'shakīl'

har haal meñ qubūl hai un kī ḳhushī mujhe

ab to KHushi ka gham hai na gham ki KHushi mujhe

be-his bana chuki hai bahut zindagi mujhe

wo waqt bhi KHuda na dikhae kabhi mujhe

un ki nadamaton pe ho sharmindagi mujhe

rone pe apne un ko bhi afsurda dekh kar

yun ban raha hun jaise ab aai hansi mujhe

yun dijiye fareb-e-mohabbat ki umr bhar

main zindagi ko yaad karun zindagi mujhe

rakhna hai tishna-kaam to saqi bas ek nazar

sairab kar na de meri tishna-labi mujhe

paya hai sab ne dil magar is dil ke bawajud

ek shai mili hai dil mein khaTakti hui mujhe

raazi hon ya KHafa hon wo jo kuchh bhi hon 'shakil'

har haal mein qubul hai un ki KHushi mujhe