ab to uTh sakta nahin aankhon se bar-e-intizar

ab to uTh saktā nahīñ āñkhoñ se bār-e-intizār

kis tarah kaaTe koī lail-o-nahār-e-intizār

un kī ulfat kā yaqīñ ho un ke aane kī umiid

hoñ ye donoñ sūrateñ to hai bahār-e-intizār

jān-o-dil kā haal kyā kahiye firāq-e-yār meñ

jaan majrūh-e-alam hai dil figār-e-intizār

merī aaheñ nā-rasā merī duā.eñ nā-qubūl

yā-ilāhī kyā karūñ maiñ sharmsār-e-intizār

un ke ḳhat kī aarzū hai un kī aamad kā ḳhayāl

kis qadar phailā huā hai kār-o-bār-e-intizār

hai dil-e-masrūr-e-'hasrat' ik tarab-zār-e-umīd

phūñk Daale gar na is gulshan ko nār-e-intizār

ab to uTh sakta nahin aankhon se bar-e-intizar

kis tarah kaTe koi lail-o-nahaar-e-intizar

un ki ulfat ka yaqin ho un ke aane ki umid

hon ye donon suraten to hai bahaar-e-intizar

jaan-o-dil ka haal kya kahiye firaq-e-yar mein

jaan majruh-e-alam hai dil figar-e-intizar

meri aahen na-rasa meri duaen na-qubul

ya-ilahi kya karun main sharmsar-e-intizar

un ke KHat ki aarzu hai un ki aamad ka KHayal

kis qadar phaila hua hai kar-o-bar-e-intizar

hai dil-e-masrur-e-'hasrat' ek tarab-zar-e-umid

phunk Dale gar na is gulshan ko nar-e-intizar